बेनिशाले साइन् गरिन् ‘द ब्लु लाइट’

News Summary

Generated by OK AI. Editorially reviewed.

‘द ब्लु लाइट’ नामक साइकोलजिकल थ्रीलर फिल्मको निर्माण हुने भएको छ, जसको निर्देशन बलिराम चौहानले गर्नेछन्।
टिजर पोस्टर मंगलबार सार्वजनिक गरिएको र फिल्मको छायांकन जेठ २१ देखि सुरु हुने बताइएको छ।
फिल्मको शीर्ष भूमिकामा बेनिशा हमाल अनुबन्धित भएकी छन्, र कलाकारमा अर्पण थापा र सृष्टि श्रेष्ठको नाम पनि उल्लेख गरिएको छ।

काठमाडौं । महिलाप्रधान कथावस्तुमा बन्न लागेको साइकोलजिकल थ्रीलर फिल्म ‘द ब्लु लाइट’ निर्माण हुने भएको छ । ‘बलिदान’ फेम्ड पटकथा लेखक तथा मुख्य सहायक निर्देशक बलिराम चौहानले यो फिल्म निर्देशन गर्नेछन् ।

मंगलबार टिजर पोस्टर सार्वजनिक गरिएको छ । स्काइफल पिक्चर्सको प्रस्तुति रहने फिल्मको सहनिर्मातामा रमन ग्रे हुनेछन् ।

नरेन्द्र मैनालीले फिल्म खिच्नेछन् । जेठ २१ देखि छायांकन सुरु हुने फिल्मलाई यसैवर्ष प्रदर्शन तयारी छ । टिजर पोस्टरमा नीलो प्रकाशको पृष्ठभूमिमा उभिएकी एक बालिकालाई चित्रण गरिएको छ ।

यो फिल्मको शीर्ष भूमिकामा बेनिशा हमाल अनुबन्धित छिन् । बैशाखमा चलचित्र विकास बोर्डबाट निर्माण इजाजत लिँदा निर्माताले कलाकारमा अर्पण थापा र सृष्टि श्रेष्ठको नाम पनि उल्लेख गरेका छन् ।

‘मैले यो फिल्मबाट निकै आशा राखेको छु । यसमा लोभलाग्दो क्यारेक्टर छ’ अनलाइनखबरसँग बेनिशाले भनिन्, ‘कुनै आर्टिस्टलाई काम देखाउन पाए हुन्थ्यो भन्ने क्यारेक्टर यसमा छ । चुनौतिपूर्ण पात्र यसमा छ ।’

कामको कुरा गर्दा, बेनिशा अहिले चितवनमा छायांकन भैरहेको ‘बिगुल’मा ब्यस्त छिन् । उनी अभिनित कल्ली, सिटामोल, मोहर र एक्लो प्रदर्शन तयारीमा छन् ।