भिजिट भिसा भ्रष्टाचार मात्र होइन, मानवतस्करी प्रकरण हो : सांसद पराजुली

रास्वपाका सांसद गणेश पराजुली । फाइल फोटो ।

News Summary

Generated by OK AI. Editorially reviewed.

सांसद गणेश पराजुलीले भिजिट भिसा प्रकरण मानवतस्करी र भ्रष्टाचारको विषय भएकाले गम्भीर छानबिन आवश्यक रहेको बताए।
मानवतस्करी उजुरीको अनुसन्धान नगरेर गृह प्रशासनले त्यसलाई प्रश्रय दिएको उनको आरोप छ।
सांसद पराजुलीले उच्चस्तरीय छानबिन समिति गठन गरी दोषीलाई कडा कारबाही गर्नुपर्ने धारणा व्यक्त गरे।

१३ जेठ, काठमाडौं । राष्ट्रिय स्वतन्त्र पार्टी (रास्वपा)का सांसद गणेश पराजुलीले भिजिट भिसा प्रकरण भ्रष्टाचारको मात्रै नभई मानवतस्करीको विषय भएकाले गम्भीर भएर छानबिन हुनुपर्ने बताएका छन् ।

मंगलबार संसद् भवन नयाँ बानेश्वरमा सञ्चारकर्मीसँग कुरा गर्दै सांसद पराजुलीले मानवतस्करी भइरहेको उजुरीको अनुसन्धान नगरेर गृह प्रशासनले त्यसलाई प्रश्रय दिएको आरोप समेत लगाए ।

अध्यागमनबाट भिजिट भिसामार्फत नेपालीहरूलाई बेच्ने प्रकरणमा राज्यका निकायहरू नै जोडिएकाले गृहमन्त्री रमेश लेखकको राजीनामा केवल नैतिकताको बिषयमात्रै हुन नसक्ने उनले बताए ।

सांसद पराजुलीले भिजिट भिसामार्फत मानवतस्करीको विषयमा अख्तियारले छानविन प्रक्रिया अघि बढाएर अध्यागमनका कर्मचारीलाई पक्राउ गर्न खोज्दा गृह मन्त्रालयले दोषी देखिएका कर्मचारीलाई बचाउन रातारात सरुवा गर्ने काम गरेको आरोप लगाए ।

गृहमन्त्री लेखकलाई दोषीसँग जोडेर हेर्ने शंकाको दायरा फराकिलो भएकाले राजीनामा दिन लगाएर अनुसन्धानको घेरामा ल्याउनुपर्ने उनको भनाइ छ ।

सांसद पराजुलीले भिजिट भिसा प्रकरणमा उच्चस्तरीय छानविन समिति गठन गरेर सत्यतथ्य छानविन गर्ने र दोषीलाई कडा कारबाही हुनुपर्ने धारणा राखे ।