बग्गीमा चढेर ‘जन्ते बाख्रो’ प्रवर्धन गर्दै गरिमा

News Summary

Generated by OK AI. Editorially reviewed.

फिल्म ‘जन्ते बाख्रो’को प्रचारका लागि काठमाडौंमा शनिबार ‘जन्ते बाख्रो साँझ’ कार्यक्रम आयोजना गरियो।
कार्यक्रममा अभिनेत्री गरिमा शर्मालाई दुलहीको भेषमा बग्गीमा राखेर र गीत प्रस्तुतिका साथ प्रचार गरिएको थियो।
निर्देशक सुनुवारले यसले दर्शकलाई प्रत्यक्ष जोड्न मद्दत गर्ने बताए र ग्रामीण चलनको कथा प्रस्तुत गर्दछ।}

काठमाडौंमा । जेठ २३ गतेदेखि प्रदर्शन तयारीमा रहेको फिल्म ‘जन्ते बाख्रो’ले प्रचारमा भिन्न शैली पछ्याएको छ । यसअघि ठूला शहरमा चल्ने सवारी साधनमा पोस्टर टाँसेर फिल्मले दर्शकलाई आकर्षित गरेको थियो ।

फिल्मले शनिबार काठमाडौंमा भिन्न शैलीको प्रचार कार्यक्रम गरेको छ । सिटी स्क्वायर मलको प्रांगणमा भव्यतासँग फिल्मले दर्शकलाई फिल्मबारे जानकारी दिने प्रयत्न गर्‍यो ।

अभिनेत्री गरिमा शर्मालाई दुलहीको भेषमा बग्गीमा राखेर सामाखुसीस्थित बिजी मलबाट कार्यक्रमस्थल पुर्‍याइयो । फिल्मको पोस्टर अंकित टिसर्ट लगाएर विवाहको शैलीमा पञ्चेबाजासहित गरिमालाई लगिएको थियो ।

‘जन्ते बाख्रो साँझ’ नाम दिइएको कार्यक्रमको उद्देश्य बृहत दर्शकमाझ फिल्मको प्रचारप्रसार गर्नु थियो । फिल्ममा समावेश गीतहरू ‘घामै राजा’, ‘अङ्गुरको झुप्पो’, ’मुकु मुकु म्या’का गायक बाबुल गिरी, महेश काफ्ले, अस्मिता अधिकारी लगायतले दर्शकलाई झुमाए ।

उक्त कार्यक्रममा गरिमासहितका कलाकार आसिफ शाह, विशाल पहारी, कमल देवकोटा, लोकेन्द्र लेखक, समापिका गौतम, निर्देशक सिमोर सुनुवार, लेखक प्रदीप भारद्वाज र निर्माता सन्तोष गौतम पनि थिए ।

यस्ता प्रमोसनल इभेन्टले सिनेमासँग दर्शकलाई प्रत्यक्ष जोड्न सघाउने भएकाले पनि आयोजना गरिएको निर्देशक सुनुवारले बताए । यो फिल्मले जन्तीलाई टपरी र दुनामा राखेर भोज खुवाउने ग्रामीण चलनको कथा पेश गर्ने निर्माता बताउँछन् ।