धमाधम हटाइँदै दोधारा चाँदनी सुक्खा बन्दरगाह निर्माणस्थलका रुख

२१ जेठ, काठमाडौं । राष्ट्रिय प्राथमिकताप्राप्त आयोजना दोधारा चाँदनी एकीकृत जाँच चौकी/सुक्खा बन्‍दरगाह निर्माण परियोजनाको कामले गति लिएको छ ।

कञ्चनपुर जिल्लाको दोधारा चाँदनी नगरपालिका–१ स्थित शुक्लाफाँटा राष्ट्रिय निकुञ्जको मध्यवर्ती क्षेत्रमा रहेको राष्ट्रिय वनक्षेत्रको ४२.३६ हेक्टर जग्गामा रहेका रुख हटाउने काम अन्तिम चरणमा पुगेको नेपाल इन्टरमोडल यातायात विकास समितिले जनाएको छ ।

उक्त जग्गा प्रयोग गर्न र जग्गामा रहेका रुख र पोल हटाउन मन्त्रिपरिषद्ले २ असोज २०८१ मा स्वीकृति दिएको थियो । उक्त निर्णय कार्यान्वयन गर्ने सम्बन्धमा राष्ट्रिय निकुञ्ज तथा वन्यजन्तु संरक्षण विभाग र नेपाल इन्टरमोडल यातायात विकास समितिबीच २३ पुस २०८१ मा सम्झौता भएको थियो ।

एकीकृत जाँच चौकी निर्माण गर्न संरक्षित क्षेत्रभित्रको राष्ट्रिय वनको ४२.३६ हेक्टर जग्गामा भएका १ हजार ५ सय ९३ वटा रुख कटान गर्न शुक्लाफाँटा राष्ट्रिय निकुञ्ज कार्यालयबाट २४ माघमा अनुमति प्राप्त भएको थियो ।

आदेश प्राप्त भएपछि समितिले १ फागुनमा रुख कटानका लागि टेन्डर प्रकाशित गरी छनोट कम्पनीबाट ८ वैशाख २०८२ देखि रुख कटान सुरु गरेको हो । हालसम्म निर्माण स्थलमा भएका रुखमध्ये ९ सय ४० वटा काटिएको छ । बाँकी रुख कटान आगामी १५ दिनभित्र सकिने समितिको भनाइ छ ।

भारत सरकारको आर्थिक तथा प्राविधिक सहयोगमा निर्माण हुने यस परियोजनाका लागि नेपाल र भारतबीच १ जुन २०२३ मा समझदारीपत्रमा हस्ताक्षर भएको थियो । आयोजनाको कुल लागत करिब ३ अर्ब ८० करोड नेपाली रुपैयाँ बराबर छ ।

हाल भारतीय पक्षबाट निर्माण कम्पनी छनोट भइसकेको र चाँडै उक्त निर्माण कम्पनीसँग सम्झौतामा हस्ताक्षर हुने जानकारी प्राप्त भएको समितको भनाइ छ ।

समितिका कार्यकारी निर्देशक आशिष गजुरेलका अनुसार रुख व्यवस्थापनको काम सकिए लगत्तै निर्माणको काम थालिने छ । यहाँ अत्याधुनिक सुविधा सम्पन्न व्यापार पूर्वाधार–सडक, पार्किङ क्षेत्र, प्लेटफर्म, गोदामघर, तौलपुल, कन्टेनर यार्ड, यात्रु टर्मिनल, भन्सार, बैंक, पशुपन्छी/खाद्य प्रयोगशाला (क्वारेन्टिन) प्रशासनिक भवन लगायत संरचना निर्माण हुँदैछन् ।