एनओसी शाखामा विद्यार्थीको नाराबाजी : हाम्रो बाटो नछेक

News Summary

Generated by OK AI. Editorially reviewed.

स्रोत अनुसार, दक्षिण कोरियाको डी–२ र डी–४ भिसाका अध्ययन अनुमति पत्र (एनओसी) स्थगित भएपछि विद्यार्थीहरूले विरोध प्रदर्शन गरेका छन्।
सरकारले विश्वविद्यालयको कालोसूचीमा राखिएको कारण एनओसी रोकिएको हो, उच्च शिक्षा महाशाखाले छानबिन समिति बनाएको छ।
अदालतले निवेदकको हकमा मात्र एनओसी दिन भनेको भए पनि, अन्य विद्यार्थीहरूको हकमा स्थगित रहेको छ।

२३ जेठ, काठमाडौं। दक्षिण कोरियाको लागि डी–२ र डी–४ भिसाको अध्ययन अनुमति पत्र (एनओसी) स्थगित भएपछि विद्यार्थीहरू आन्दोलित भएका छन् । शुक्रबार सानोठिमीस्थित एनओसी शाखामा पुगेर विद्यार्थीहरूले विरोध प्रदर्शन गरेका छन् ।

‘हाम्रो बाटो नछेक। एनओसी हाम्रो अधिकार हो । शिक्षा हाम्रो अधिकार हो,’ विद्यार्थीहरूले नारा लगाउँदै एनओसी खोल्न माग गरेका छन् ।

गत २८ वैशाखमा शिक्षा, विज्ञान तथा प्रविधि मन्त्रालयले दक्षिण कोरियाको लागि डी–२ र डी–४ भिसाको लागि अध्ययन अनुमति पत्र (एनओसी) रोक्ने निर्णय गरेको थियो । यसको विरोधमा विद्यार्थीहरूले प्रदर्शन गरेका हुन् ।

सरकारको निर्णयको विरुद्ध केही विद्यार्थी सर्वोच्च अदालत गएका थिए । तर अदालतले निवेदकको हकमा मात्र एनओसी दिनु भनेकाले ८ जनालाई दिइएको अरुको हकमा स्थगित यथावत रहेको एनओसी शाखाले जनाएको छ ।

‘विद्यार्थीहरूले प्रदर्शन गरिरहेका छन्। हामीले केही गर्न सक्ने स्थिति छैन। अदालतले निवेदकको हकमा भनेको मात्र दिन भनेको हो,’ शाखा प्रमुख उत्तम आचार्यले भने ।
विद्यार्थीहरू कोरियामा डी–२ र डी–४ भिसामा अन्डर ग्र्याजुयट अध्ययन गर्न जाने गरेका छन् ।

यो भिसामा गएका विद्यार्थीहरू कोरिया सरकारले नै कालोसूचीमा राखेको विश्वविद्यालयमा आवेदन दिने गरेको पाइपछि एनओसी स्थगित गरेको हो । मन्त्रालयले अध्ययन अनुसन्धान गर्न उच्च शिक्षा महाशाखा बैकुण्ठ अर्यालको संयोजकत्वमा छानबिनसमिति बनाइएको छ।

समितिले छानबिन गरेर प्रतिवेदन तयार पारेपछि मात्र एनओसी खोल्ने वा के गर्ने निर्णय हुने मन्त्रालयले जनाएको छ । विद्यार्थी र कन्सल्टेन्सीहरूले भने एनओसी खोल्न दबाब दिइरहेका छन् ।