गुल्मी खेलकुद विकास समिति कर्मचारीविहीन

News Summary

Generated by OK AI. Editorially reviewed.

गुल्मी जिल्ला खेलकुद विकास समिति २०८० माघदेखि कर्मचारीविहीन छ।
कर्मचारी नहुँदा खेलकुदका कार्यक्रमहरू प्रभावित भएका छन्।

२६ जेठ, गुल्मी । झन्डै डेढ वर्षदेखि गुल्मी जिल्ला खेलकुद विकास समिति कर्मचारीविहीन भएको छ ।

कार्यालय प्रमुखको रूपमा रहेका डिल्ली बिक २०८० माघमा सरुवा भएयता गुल्मी खेलकुद विकास समिति कर्मचारीविहीन बनेको हो ।

खेलकुद विकास समिति गुल्मीमा प्रमुखसहित एक जना लेखा अधिकृत, कम्प्युटर अपरेटर र एक जना प्रशिक्षकको दरबन्दी भए पनि कार्यालय कुर्न अहिले एक जना कार्यालय सहयोगी मात्रै छन् ।

समग्र जिल्लाको खेलकुद विकासको क्षेत्रमा काम गर्ने विकास समिति लामो समयदेखि कर्मचारीविहीन हुँदा पनि जनशक्ति व्यावस्थापन हुन सकेको छैन ।

तेक्वान्दो, कराँते, भलिबल, एथ्लेटिक्स, बक्सिङ, उस्सु लगायतका प्रशिक्षक हुनुपर्ने भए पनि स्वयंसेवकहरूले प्रशिक्षण दिइरहेका छन् ।

जिल्लामा खेलकुद क्षेत्रको विकास र समृद्धिमा काम गर्ने प्रमुख संस्था नै जनशक्ति र प्रशिक्षक विहीन हुँदा खेलाडीहरू निराश छन् ।

काम चलाउ रूपमा कार्यालय सहयोगीलाई तलब खुवाउने बाहेक करिब एक वर्षदेखि आर्थिक तथा प्रशासनिक कुनै काम गर्न नसकिएको समितिका अध्यक्ष गिरीप्रसाद महाकिमले बताए ।

कार्यालय प्रमुख र प्रशिक्षकका विषयमा राष्ट्रिय खेलकुद परिषद्‍मा जानकारी गराए पनि कुनै टुंगो नभएको महाकिमले बताए ।

जिल्ला खेलकुद विकास समिति गुल्मीले धेरै वर्षदेखि कर्मकान्डी रूपमा जिल्ला स्तरीय राष्ट्रपति रनिङ शिल्ड प्रतियोगिता मात्रै गराउँदै आएको छ ।

लुम्बिनी खेलकुद परिषद्‍का सदस्य महेश काउछाले जिल्ला खेलकुद विकास समिति प्रमुखविहीन हुँदा काम गर्न कठिनाइ भएको बताए ।