सद्गुरु कबीरको प्रकट्य दिवस मनाइँदै, मधेश प्रदेशमा सार्वजनिक बिदा

News Summary

Generated by OK AI. Editorially reviewed.

मधेश प्रदेशले आज सद्गुरु कबीर दासको ६२७औं जन्म जयन्तीको अवसरमा पहिलो पटक सार्वजनिक बिदा घोषणा गरेको हो।
कबीर दासको जन्म सन् १३९८ मा ब्रह्ममुहूर्तमा लहरतारा तालमा भएको मानिन्छ र उनका अनुयायीहरूले यस दिनलाई कबीर प्रकट्य दिवसको रूपमा मनाउँछन्।
कबीरदास १५औं शताब्दीका हिन्दी भक्ति कवि थिए र उनका रचनाले हिन्दू र मुस्लिम दुवै समुदायमा प्रभाव पारेका छन्।

२८ जेठ, जनकपुधराम । मधेश प्रदेशमा आज सद्गुरु कबीर दासको ६२७औं जन्म जयन्तीको अवसरमा सार्वजनिक बिदा दिइएको छ । मधेश सरकारले पहिलो पटक कबीर जन्म जयन्तीको सम्मानमा सार्वजनिक बिदा घोषणा गरेको हो ।

कबीर सागरमा वर्णन अनुसार कबीर साहेबको अवतरण सन् १३९८ (संवत १४५५) जेठ महिनाको पूर्णिमा दिन ब्रह्ममुहूर्तको समयमा लहरतारा तालमा फुलेको कमलको फूलबाट भएको मानिन्छ । त्यस स्थानबाट नीरु र नीमा नाम गरेका एक साधारण दम्पतीले उनलाई घर लगेका थिए । उनका अनुयायीहरू यस दिनलाई कबीर प्रकट्य दिवसको रूपमा मनाउने गर्छन् ।

कबीरदास १५औं शताब्दीका हिन्दी भक्ति कालका प्रमुख निर्गुण शाखाका कवि थिए । समाजमा व्याप्त कुरीति, अन्धविश्वास र धार्मिक आडम्बरको कडा आलोचक कबीरको रचनाले हिन्दी क्षेत्रमा भक्ति आन्दोलनलाई गहिरो प्रभाव पारेका छन् ।

उनको रचना हिन्दू र मुस्लिम दुवै समुदायका मानिसहरूले उनलाई गुरुका रूपमा मानेका थिए । कबीरको शिक्षामा आधारित कबीर पंथ नामक सम्प्रदाय आज पनि सक्रिय रूपमा फैलिएको छ ।

मधेश सरकारले पहिलोपटक सार्वजनिक बिदा दिएको खुसीमा कबीरपन्थीहरुले पूर्वसन्ध्यामा जनकपुरमा र्‍याली आयोजन गरेका थिए । जनकपुरको सद्गुरु कबीर बालबात्सल्य आश्रमबाट संचालक सत्यनारायण आलोकको नेतृत्वमा निस्केको र्‍याली जनकपुरको विभिन्न भागको परिक्रमा गरेका थिए । सो अवसरमा सरकारका प्रतिनिधिको रुपमा वन तथा वातावरण मन्त्री संजयकुमार यादवलाई उनीहरुले सम्मान गरेका थिए ।

आज पनि कबीर पन्थीहरु विभिन्न कार्यक्रम गरी सद्गुरु कबीरको प्रकट्य दिवस मनाउँदैछन् ।