‘शार्क ट्यांक नेपाल’ पहिलो सिजनको प्रसारण असार १८ देखि

News Summary

Generated by OK AI. Editorially reviewed.

बिजनेस रियालिटी शो ‘शार्क ट्यांक नेपाल’को प्रसारण असार १८ गतेदेखि सुरु हुनेछ।
शोको पहिलो सिजनमा पाँचजना जज र २००१ देखि विश्वव्यापी रुपमा प्रसारित हुँदै आएको शोको नेपाल संस्करण हो।
शोले ३५ देखि ४० करोड रुपैयाँसम्मको लगानी उद्यमीहरूलाई जुटाउने लक्ष्य राखेको छ।

काठमाडौं । बिजनेस रियालिटी शो ‘शार्क ट्यांक नेपाल’को प्रसारण असार १८ गतेदेखि सुरु हुने भएको छ । प्रत्येक बुधबार र बिहीबार राती ९ बजे शो प्रसारण हुने हिमालय टिभीले जनाएको छ ।

पहिलो सिजनमा आइएमई समूहका सहसंस्थापक हेमराज ढकाल, अग्नि ग्रुपका संस्थापक क्याबिनेट श्रेष्ठ, वैद्य अर्गनाइजेसनकी निर्देशक ऋतुसिंह वैद्य, निम्बस ग्रुपका प्रबन्ध निर्देशक आनन्द बगारिया र पद्मज्योति ग्रुपका निर्देशक सौरभ ज्योति सार्क (जज)को रुपमा छन् ।

सन् २००१ मा जापानको निप्पोन टिभीमा ‘मनी टाइगर्स’को रुपमा सुरु भएको यो शो अहिले विश्वकै ठूलो व्यावसायिक रियालिटी टिभी शो बनेको छ । सोनी पिक्चर्स टेलिभिजनले विश्वभर वितरण गर्दै आएको यो शोको नेपाल संस्करण ५४ औं फ्रेन्चाइज हो ।

शोको निर्देशकमा ‘हिमालय रोडिज’ फेम्ड सिमोस सुनुवार छन् । एउटा एपिसोडमा पाँच जना उद्यमी गरेर कुल २० एपिसोडमा १०० जना उद्यमीले आफ्नो व्यवसाय र उद्यमशीलताको आइडिया पिच गरेका छन् । शोको छायांकन भैसकेको छ ।

शोका जजमार्फत ३५ देखि ४० करोड रुपैयाँ लगानी उद्यमीलाई जुटाइदिने जनाइएको छ । हिमालय टिभीले नेपालमा विभिन्न अन्तर्राष्ट्रिय रियालिटी टिभी शोहरूको उत्पादन तथा प्रसारण गर्दै आइरहेको छ ।

द भ्वाइस अफ नेपाल, भ्वाइस किड्स, हिमालय रोडिज प्रसारण भइरहेका छन् भने यसैवर्ष अर्को अन्तर्राष्ट्रिय फेसन रियालिटी शो नेपाल नेक्स्ट टप मोडल पनि प्रसारण हुने तयारीमा छ ।