आफ्नै निर्णयबाट पछि हटे बालेन, चार जनालाई पुरानै जिम्मेवारी

५ असार, काठमाडौं । काठमाडौं महानगरपालिकाका प्रमुख बालेन्द्र शाह आफैंले गरेको निर्णयबाट पछि हटेका छन् ।

१ जेठमा बालेनले सूचना प्रविधि समिति संयोजक नवीन मानन्धर, सुशासन समिति संयोजक ख्यामराज तिवारी, सम्पदा तथा पर्यटन समिति संयोजक आशामान संगत र विधायन समिति संयोजक मचाराजा महर्जनको जिम्मेवारी खोसेका थिए ।

उक्त निर्णय खोसिएकोमा वडाध्यक्षहरूले विरोध जनाएका थिए ।

उक्त निर्णयबाट मेयर शाह पछि हटेको एक वडाध्यक्षले जानकारी दिए । ‘पछिल्लो समय आफू (मेयर शाह) ले गरेका केही बचकाना निर्णयबाट पनि पछि हट्नु भएको छ,’ एक वडाध्यक्षले भने ।

उनीहरूको स्थानमा सूचना प्रविधि समिति संयोजकमा एमालेबाट निर्वाचित वडाध्यक्ष वीरेन्द्र प्रजापति, कांग्रेसबाट नै निर्वाचित वडाध्यक्ष दलबहादुर कार्कीलाई सुशासन समिति संयोजक, सम्पदा तथा पर्यटन समितिका संयोजकमा कांग्रेसबाट निर्वाचित विनोदकुमार राजभण्डारी र विधायन समितिमा रास्वपाबाट निर्वाचित रोजिना श्रेष्ठ संयोजक तोकिएका थिए ।

बालेनले नगर कार्यपालिका (कार्य सम्पादन) नियमावली २०७४ को नियम १५ बमोजिम गठन भएको समिति संयोजकको जिम्मेवारी फिर्ता गरेर उपनियम (१) बमोजिम नयाँ संयोजक तोकिएको बताएका थिए ।

यो पनि पढ्नुहोस

बालेनले फेरे ४ वटा समितिका संयोजक

तर, नयाँ तोकिएको समिति संयोजकमा रास्वपाबाट निर्वाचित वडाध्यक्ष श्रेष्ठबाहेक कांग्रेसबाट निर्वाचित वडाध्यक्ष प्रजापति र कार्की तथा एमालेबाट निर्वाचित राजभण्डारीले भने बालेनले दिएको समिति संयोजकको जिम्मेवारी अस्वीकार गरे ।

श्रेष्ठले भने जिम्मेवारी स्वीकार गरिन् ।

पछिल्लो समय कार्यपालिका बैठक समेत राख्न नसकिरहेका बेला कार्यपालिका र नगरसभा सदस्यहरूले निरन्तर दबाब दिइरहेका छन् ।