पोखरा कलेज अफ म्यानेजमेन्टमा नमूना पत्रकार सम्मेलन

News Summary

Generated by OK AI. Editorially reviewed.

पोखरा कलेज अफ म्यानेजमेन्टमा बीबीए विद्यार्थीहरूले नमुना पत्रकार सम्मेलन अभ्यास सम्पन्न गरे।
कार्यक्रमले विद्यार्थीहरूलाई मिडिया समन्वय, पत्रकार सम्मेलन सञ्चालन र प्रेस विज्ञप्ति तयार गर्ने सीप सिकाएको बताइन्छ।
पत्रकारहरू र सहभागी विद्यार्थीहरूले सिकाइको अनुभव र कार्यक्रमको महत्व औंल्याएका छन्।

६ असार, पोखरा । पोखरा कलेज अफ म्यानेजमेन्टमा बीबीए आठौं सेमेस्टरमा अध्ययनरत विद्यार्थीहरूले शुक्रबार नमुना पत्रकार सम्मेलन अभ्यास कार्यक्रम सम्पन्न गरेका छन् ।

पोखरा उद्योग वाणिज्य संघको सभाकक्षमा दुईवटा सेक्सनका ६९ जना विद्यार्थीले ६ वटा समूहमा बाँडिएर अभ्यासको प्रस्तुतिकरण गरेका थिए । बीबीए अन्तिम सेमेस्टरमा मिडिया र जनसम्पर्क विषय अध्ययनरत विद्यार्थीहरूले कार्यक्रममार्फत मिडियासँग समन्वय गर्ने कला सिकेको कलेजका दिवा कार्यक्रम संयोजक सरोज कुँबरले बताए ।

क्याम्पस प्रमुख लिना श्रेष्ठ नेगीले विद्यार्थीहरूले यस्ता कार्यक्रमबाट आफ्नो व्यावसायिक जीवनमा अत्यन्त काम लाग्ने सीप सिक्ने बताइन् ।

कार्यक्रमबाट कार्यक्षेत्रमा मिडियासँग सम्बन्ध राख्न, पत्रकार सम्मेलन सञ्चालन गर्न तथा प्रेस विज्ञप्ति तयार गर्न सिकेको विषय शिक्षक सुवास मल्लले जानकारी दिए ।

पत्रकारहरू शान्ति गुरुङ, शोभाकान्त सिग्देल र केशवशरण लामिछनेले विद्यार्थीहरूको प्रस्तुतिमा टिप्पणी तथा मूल्यांकन गरेका थिए । पोखरामा लामो समयदेखि पत्रकारिता गरिरहेका पत्रकारहरूबाट नमूना पत्रकार सम्मेलनमा पृष्ठपोषण पाउँदा वास्तविक सिकाइको अनुभव भएको सहभागी विद्यार्थी गायत्री भट्टराईले बताइन् ।

पोखरा विश्वविद्यालयबाट सम्बन्धप्राप्त पोखरा कलेज अफ म्यानेजमेन्टले विगत दुई दशकदेखि व्यवस्थापन संकायमा अध्ययन अध्यापन गराउँदै आएको छ ।