अमेरिकाको टेक्सासमा बाढीको कहर : २७ को मृत्यु, आपतकाल घोषणा

२१ असार, काठमाडौं । अमेरिकाको टेक्सासमा बाढीका कारण मृत्यु हुनेको संख्या २७ पुगेको छ । शुक्रबार बिहानदेखि आएको विनासकारी बाढीमा २७ जनाको मृत्यु भएको र यो संख्या बढ्न सक्ने सीएनएनले उल्लेख गरेको छ ।

ज्यान गुमाउनेमा १८ जना वयस्क र नौ जना बालबालिका छन् । टेक्सास मिलिटरी डिपार्टमेन्टका मेजर जनरल थोमस एम. सुएल्जरले शनिबार बिहान (स्थानीय समय अनुसार) सम्म ८५० जनाको उद्धार गरिएको जानकारी दिए ।

अधिकांशलाई हेलिकोप्टरको सहायताले उद्धार गरिएको उनले बताए । बाढीका कारण बेपत्ता भएकाहरु नभेटिएसम्म उद्धार कार्य जारी रहने अधिकारीहरुले बताएका छन् ।

बाढीका कारण टेक्सासका कयौं क्षेत्रमा आपतकाल घोषणा गरिएको छ भने सडक सञ्जाल र टेलिफोन नेटवर्क बिच्छेद्‌ भएको छ ।

टेक्सासको ग्वाडालुपे नदी आसपासका क्षेत्रमा शुक्रबार बिहानदेखि भारी वर्षा हुँदा बाढी आएको गार्जिएनले जनाएको छ । अचानकको भारी वर्षाले नदीको सतह झन्डै ४५ मिनेटमै २६ फिट (७.९ मिटर) बढेको अधिकारीहरुले बताएका छन् ।

बाढीका कारण ग्वाडालुपे नदी किनारमा अवस्थित छात्रा आवास क्रिस्चियन समर क्याम्पका कम्तिमा २३ देखि २५ जना हराइरहेका छन् । यो क्याम्प सान एन्टोनियादेखि उत्तर–पश्चिम १०५ किलोमिटरको दूरीमा पर्छ ।

टेक्सासका अधिकारीहरुका अनुसार कर काउन्टीमा १४ वटा हेलिकोप्टर, १२ वटा ड्रोन र ५०० भन्दा बढी सुरक्षाकर्मीहरु परिचालन गरी उद्धार कार्य चलिरहेको छ ।

बाढीमा फँसेका केही वयस्क र बालबालिकाहरुलाई रुखबाट समेत उद्धार गरिएको थियो । टेक्सास गभर्नर ग्रेग एबटले घटनालगत्तै उद्धार कार्य थालिएको र जारी रहेको बताएका छन् ।

राष्ट्रपति डोनाल्ड ट्रम्पले गभर्नर एबटसँग मिलेर सरकार बाढीपीडितहरुको उद्धार तथा राहत कार्यमा जुटेको बताएका छन् । ‘हामी उनीहरुको हेरचाह गर्छौं,’ ट्रम्पले एयर फोर्स वनमा पत्रकारहरुसँग कुरा गर्दै बाढीलाई ‘डरलाग्दो र आश्चर्यजनक’ भनेका छन् ।

-तस्वीरहरु: सीएनएन/गार्जिएन