मलेसियामा पुलिसको हेलिकप्टर नदीमा खस्यो

काठमाडौं । मलेसियाको जोहोर राज्यमा बुधबार बिहान एक पुलिस हेलिकप्टर आपतकालीन अवतरण गर्ने क्रममा सीधै नदीमा खसेको छ। दुर्घटना सुंगाई पुलाई क्षेत्रमा भएको स्थानीय सञ्चार माध्यमहरूले खबर लेखेका छन् ।

दुर्घटनाको बेला हेलिकप्टर एक नियमित सैन्य अभ्यासरत थियो । हेलिकप्टरमा सवार पाँचै जना चालक दलका सदस्यहरूलाई सकुशल उद्दार गरिएको छ।

उद्धारपछि घाइते सबै अधिकारीहरूलाई जोहोर बारुको सुल्ताना अमीना अस्पतालमा भर्ना गरिएको छ । मलेसियाको सिभिल एभिएसन अथोरिटीका अनुसार घटनाको छानबिन एयर एक्सिडेन्ट इन्भेस्टिगेसन ब्युरोले गर्नेछ।

टेकअफपछि केही मिनेटमै दुर्घटना

त्यहाँको नागरिक उड्डयन प्राधिकरण (सीएएएम) का अनुसार, हेलिकप्टरले बिहान ९:५१ बजे तंजुंग कुपांग पुलिस स्टेसनबाट उडान भरेको थियो । तर केही मिनेटमै प्राविधिक गडबडीका कारण आपतकालीन अवतरण गर्नु पर्‍यो । यसक्रममा हेलिकप्टर सिधै नदीमा खसेको हो ।

घटनामा कसैको मृत्यु नभए पनि मलेसियाली नागरिक उड्डयन प्राधिकरणले यसलाई गम्भीर विमान दुर्घटना मानेर औपचारिक छानबिन सुरु गरिसकेको छ।

३० वर्ष पुरानो हेलिकप्टर

दुर्घटनामा परेको हेलिकप्टर फ्रान्समा निर्मित एयरबस एएस३५५एन मोडलको थियो। यो हल्का, एक-रोटर युटिलिटी हेलिकप्टर हो । यसलाई विश्वभर सुरक्षा निकाय, निजी चार्टर सेवा तथा कर्पोरेट प्रयोजनमा प्रयोग गरिन्छ।

मलेसिया प्रहरीले यो हेलिकप्टर सन् १९९६ मा प्राप्त गरेको थियो। यसको स्थानमा नयाँ हेलिकप्टर खरिदका लागि २०२३ को नोभेम्बरमा टेन्डर आह्वान गरिएको थियो।