संसद्‌मा उठ्यो कम्पनी रजिष्ट्रारको घुस डिल प्रकरण, तुरुन्तै छानबिन र कारबाहीको माग

News Summary

Generated by OK AI. Editorially reviewed.

राष्ट्रिय सभाको बैठकमा नेकपा एकीकृत समाजवादीका सांसद घनश्याम रिजालले कम्पनी रजिष्ट्रार कार्यालयमा घुस डिल भएको विषय उठाए।
रिजालले सर्भर डाउनको बहानामा अनलाइन सिस्टम बन्द गरी रकम असुल गरेको भन्ने विषयमा गम्भीर छानबिनको माग गरे।
उनले छानबिन र कारबाहीको माग गर्दै सम्बन्धित निकायको ध्यानाकर्षण गराउने बताए।

२७ असार, काठमाडौं । कम्पनी रजिष्ट्रारमा ‘सिस्टम डाउन’ गराएर घुस डिल भएको विषय संसद्‌मा उठेको छ ।

शुक्रबार बसेको राष्ट्रिय सभाको बैठकमा यो विषय उठेको हो ।

नेकपा एकीकृत समाजवादीका सांसद घनश्याम रिजालले कम्पनी रजिष्ट्रारको कार्यालयमा भएको घुस डिल प्रकरणबारे सरकारको ध्यानाकर्षण गरे ।

‘सर्भर डाउनको बाहनामा अनलाइन सिस्टमलाई बन्द गराइ नवीकरण गर्दा र कम्पनी दर्ता गर्दासमेत प्रतिशत तोकेर रकम असुल गर्ने गरेको समाचार अनलाइनखबरले प्रकाशित गरेको छ,’ सांसद रिजालले भने ।

यो विषय गम्भीर रहेको भनेर उनले आपत्ति जनाए । ‘कम्पनी दर्ता गर्दा घुस खुवाउनुपर्ने भएपछि जनताले किन र कसरी व्यवसाय गर्छन, कसरी लगानीको वातावरण बन्छ र युवा किन देशमा बस्छन ?’ रिजालको प्रश्न छ ।

यो पनि पढ्नुहोस

कम्पनी रजिष्ट्रारमा ‘सिस्टम डाउन’ गराएर घुस डिल, चुक्ता पूँजीको ०.३ प्रतिशत बुझाएपछि दर्ता

प्रधानमन्त्री केपी शर्मा ओलीले आफ्नै नेतृत्वमा सुशासन आयोग गठन गरेको स्मरण गर्दै रिजालले भने, ‘तर, सिंहदरबारको एक किलोमिटर दुरीमा रहेको त्रिपुरेश्वरस्थित कम्पनी रजिष्ट्रार कार्यालयमा सर्भर डाउनको नाममा सरकारको सुशासन र सिस्टम डाउन भएको छ ।’

यो विषय छानबिन गर्न उनको माग छ । उनले भनेका छन्, ‘म तुरुन्त छानबिन र कारबाहीको लागि सम्माननीय अध्यक्षज्युमार्फत सम्बन्धित निकायको ध्यानाकर्षण गराउँदछु ।’