कर्णाली प्रदेशमा कागज उद्योगको क्षमता उपयोग ९७ प्रतिशत

३० असार, काठमाडौं । कर्णाली प्रदेशका कागज उत्पादन गर्ने कम्पनीको उत्पादन क्षमता सबैभन्दा उच्च रहेको छ ।

चालु आर्थिक वर्ष २०८१/८२ को पहिलो ६ महिनामा कर्णालीमा रहेका कम्पनीहरूको उत्पादन क्षमता ९७ प्रतिशत पुगेको हो ।

नेपाल राष्ट्र बैंकका अनुसार चालु आव पुससम्म कर्णाली प्रदेशका कागज उत्पादन कम्पनीको क्षमता उपयोग एक प्रतिशत बिन्दुले बढेको हो ।

गत आव सोही अवधिमा कर्णालीको कागज उत्पादन सम्बन्धी उद्योगको उपयोग क्षमता सबैभन्दा बढी ९६.१५ प्रतिशत थियो ।

कर्णालीका उद्योगहरूको औसत क्षमता उपयोग भने ३७.९३ प्रतिशत रहेको केन्द्रीय बैंकले जनाएको छ । प्रदेशमा सञ्चालन भएका उद्योगमध्ये कागज उत्पादन सम्बन्धी उद्योगको क्षमता उपयोग सबैभन्दा बढी ९७ प्रतिशत छ भने दुग्ध पदार्थ उत्पादन गर्ने उद्योगको २६ प्रतिशतमात्र छ ।

चालु आव पहिलो ६ महिनामा औद्योगिक कर्जा गत अवधिको तुलनामा १४.९५ प्रतिशतले वृद्धि भएको छ । कर्णाली प्रदेशमा प्रवाह भएको समग्र कर्जाको ६.४१ प्रतिशत हिस्सा औद्योगिक कर्जाले ओगटेको छ ।

राष्ट्रिय तथ्यांक कार्यालयका अनुसार चालु आव नेपालको आर्थिक वृद्धिदर उपभोक्ता मूल्यमा ४.६ प्रतिशत रहने प्रारम्भिक अनुमान छ । गत आव २०८०/८१ मा नेपालको आर्थिक वृद्धिदर ३.७ प्रतिशत रहने संशोधित अनुमान छ ।

चालु आव कर्णाली प्रदेशको आर्थिक वृद्धिदर ४.७ प्रतिशत रहने प्रारम्भिक अनुमान छ । यस प्रदेशको कुल गार्हस्थ उत्पादन (जीडीपी) मा कृषि, उद्योग र सेवा क्षेत्रको योगदान क्रमश: ३१.५ प्रतिशत, ९.६ प्रतिशत र ५८.९ प्रतिशत रहने प्रारम्भिक अनुमान छ ।

चालु आव प्रथम अर्धवार्षिकमा कर्णाली प्रदेशको समग्र कृषि बालीले ढाकेको भूक्षेत्र अघिल्लो वर्ष सोही अवधिको तुलनामा ०.११ प्रतिशतले घटेको छ ।

प्रमुख खाद्य बालीमध्ये धान, मकै गहुँ, कोदो र जौले ढाकेको क्षेत्रफलमा क्रमश: ५.११ प्रतिशत, ४.१६, ४.८६, ११.५२ र १.३९ प्रतिशतले ह्रास आएको केन्द्रीय बैंकले जनाएको छ । तरकारी र फलफूल बालीले ढाकेको क्षेत्रफलमा क्रमश: ३३.८८ प्रतिशत र ८.१७ प्रतिशतले वृद्धि भएको छ ।

समीक्षा अवधिमा बैंक तथा वित्तीय संस्थाबाट कर्णाली प्रदेशको समग्र कृषि क्षेत्रमा प्रवाहित कर्जाले कुल कर्जाको ८.७१ प्रतिशत हिस्सा ओगटेको छ । त्यस्तै बैंक तथा वित्तीय संस्थाबाट कर्णालीको समग्र कृषि क्षेत्रमा प्रवाहित कर्जा गत आव सोही अवधिको तुलनामा १४.०१ प्रतिशतले वृद्धि भएको छ ।

यस प्रदेशमा बैंक तथा वित्तीय संस्थाद्वारा प्रवाहित कुल कर्जामध्ये सबैभन्दा धेरै ८४.८९ प्रतिशत सेवा क्षेत्रमा प्रवाह भएको छ । वाणिज्य बैंक तथा वित्तीय संस्थाको शाखा संख्या ४ सय ७७ पुगेको छ भने शाखारहित बंैकिङ संख्या २६ कायम भएको छ । उक्त अवधिमा कर्जा तथा निक्षेप अनुपात ८१.६७ प्रतिशत छ ।

चालु आव यस प्रदेशमा विद्युत् प्रसारण लाइन २ हजार ४ सय १६ किलोमिटर पुगेको छ भने १७.४१ मेगावाट विद्युत् उत्पादन भएको छ ।

कर्णाली प्रदेशमा निर्माणाधीन पुष्पलाल लोकमार्ग, कर्णाली करिडोर, मदन भण्डारी राजमार्ग र भेरी बबई डाइभर्सन बहुउद्देश्यीय आयोजना निर्माण कार्यले गति लिइरहेको राष्ट्र बैंकले जनाएको छ ।