भक्तपुरको चाँगुनारायण मन्दिरमा दर्शनार्थीको घुइँचो

News Summary

Generated by OK AI. Editorially reviewed.

भक्तपुरको चाँगुनारायण मन्दिरमा आज नागपञ्चमीको अवसरमा बिहानदेखि दर्शनार्थीको भीड लागेको छ।
मन्दिरमा पूजा गरेपछि भक्तजनले घरघरमा नाग टाँस्ने प्रचलन छ र मध्यपुरथिमिबाट गुँला बाजाले प्रदक्षिणा गरेको छ।
शङ्खदहमा स्नान गरी पूजा गर्ने परम्परा छ र मन्दिरका पुजारीले नागपञ्चमीमा दिनभर दर्शनार्थीको भीड लाग्ने बताए।

१३ साउन, भक्तपुर। भक्तपुरको चाँगुनारायण मन्दिरमा आज बिहानदेखि दर्शनार्थीको भीड लागेको छ । विश्व सम्पदा सूचीमा सूचिकृत सो मन्दिरमा आज नागपञ्चमीको मेला भर्ने भक्तजनको घुइँचो लागेको हो ।

चाँगुनारायण मन्दिरमा पूजा एवं दर्शन गरेपछि घरघरमा नाग टाँस्ने प्रचलन छ । बिहानदेखि मध्यपुरथिमिबाट आएको गुँला बाजाले मन्दिर प्रदक्षिणा गरेको छ ।

मन्दिरदेखि दक्षिणतर्फ ओरालोमा रहेको ऐतिहासिक शङ्खदह (साङ्ग दह) मा स्नान गर्न आउनेको पनि भीड छ ।

शंख दहमा स्नान गर्ने, पूजा गर्ने र दान गर्नेको भीड लागेको मन्दिरका पुजारी आभास राजोपाध्यायले जानकारी दिनुभयो । शङ्खदहमा स्नान गरेर चाँगुनारायण मन्दिरमा आएर शिव र विष्णुको पूजा गर्ने परम्परा छ ।

चाँगुनारायण मन्दिरका मूल पुजारी चक्रधरानन्द राजोपाध्यायले हरेक वर्ष नागपञ्चमीमा बिहानदेखि दिनभर दर्शनार्थीको भीड लाग्ने बताए ।

उनले मन्दिरभित्र भक्तजनले एकै पटक शिव र विष्णुको दर्शन गर्ने बताए । उनले भने, ‘नागपञ्चमी नाग देवतासँग सम्बन्धित छ । आज दिनभर दर्शनार्थीको भीड लाग्ने गर्छ।’