निलम्बित भएपछि रञ्जिता निकटस्थसँग छलफलमा, भन्छिन्- रेशमजीले ‘इमोश्नल ब्ल्याकमेल’ गर्नुभयो

१५ साउन, काठमाडौं । नागरिक उन्मुक्ति पार्टी (नाउपा) ले अध्यक्षबाट निलम्बन गरेपछि रञ्जिता श्रेष्ठले निकटस्थसँग छलफल थालेकी छन् ।

बिहीबार नाउपाको राष्ट्रिय भेलाले पार्टी अध्यक्षमा लालवीर चौधरीलाई चयन गरेपछि निलम्बनमा परेकी रञ्जिताले आफू निकटका नेताहरुसँग छलफल थालेकी हुन् ।

बिहीबार साँझ काठमाडाैंको महाराजगञ्जस्थित पार्टी केन्द्रीय कार्यालयमा जिल्लाका नेताहरुसँग छलफल गरेकी छन् । रञ्जिताले कैलालीका पालिका अध्यक्ष, उपाध्यक्ष, वडाअध्यक्ष र केही प्रदेश सांसदहरुलाई महाराजगञ्ज डाकेकी थिइन् ।

उनले कैलालीको जोशीपुर गाउँपालिकाका अध्यक्ष चित्र बहादुर चौधरी, कैलालीको भजनी नगरपालिकाकी उपाध्यक्ष राजु तिरुवा, जानकी गाउँपालिकाकी उपाध्यक्ष लालमती देवी कठरिया तथा केही प्रदेश सांसद र वडाअध्यक्षहरुसँग परामर्श गरेको बताइन् ।

उनले भनिन्, ‘आज भेट भएका पार्टीका साथीहरुले पनि अवैधानिक तरिकाले अध्यक्ष चयन गरेको मान्दैनौं भन्नुभएको छ ।’

रञ्जिताको प्रश्न छ– ‘मैले कुनै कानूनी कदम चाले नवअध्यक्ष लालवीर चौधरीको सांसद पद धरापमा पर्यो भने जवाफदेही को हुन्छ ?’

बिहीबार नाउपाको अध्यक्षमा चयन भएका लालवीर, रेशम चौधरीका पिता हुन् ।

यो पनि पढ्नुहोस

नाउपाको संकट टरेन

नाउपाका संरक्षक रहेका रेशम चौधरीले श्रीमती रञ्जितालाई हटाएर आफ्ना पितालाई अध्यक्ष बनाएपछि रञ्जिता क्रुद्ध छिन् ।

लालवीरलाई अध्यक्ष नबनाए रेशम चौधरीले ‘झुन्डिएर मर्दिन्छु’ भन्दै ‘इमोश्नल ब्ल्याकमेलिङ’ गरेको रञ्जिताको आरोप छ ।

‘बुवालाई अध्यक्ष नबनाउने भए झुन्डेर मर्दिन्छु भनेर रेशम चौधरीले इमोश्नल ब्ल्याकमेलिङ गर्नुभयो’, रञ्जिताले अनलाइनखबरसँग भनिन् ।

महाराजगञ्जमा नेताहरुसँग भेटपछि रञ्जिताले सामाजिक सञ्जाल फेसबुकमा एक संस्कृत श्लोक लेख्दै कटाक्ष गरेकी छन् ।

उनले लेखेको संस्कृत श्लोक :

मूर्खस्य पञ्च चिह्नानि —

गर्वो दुर्वचनं तथा ।

क्रोधश्च दृढवादश्च

परवाक्येषु अनादर: ।।

यसलाई नेपालीमा अर्थ्याउँदा मूर्ख व्यक्तिका पाँच लक्षणहरू वर्णन गर्ने प्रसिद्ध नीति श्लोक हो ।

जस्तो :

घमण्ड (आफूलाई धेरै ठान्ने) ।

खोइचो वा अपशब्द बोल्ने बानी ।

सधैं रिसाउने स्वभाव ।

आफ्नो कुरा मात्रै ठीक ठान्ने र अडिग रहने ।

अरूका विचारप्रति अनादर गर्ने ।

रञ्जिताले यो श्लोकद्वारा कसलाई कटाक्ष गरेको भनेर नबताएपनि उनले भनिरहेको ‘विधानविपरीत’ पार्टी निर्णय गर्नेहरुप्रति लक्षित भएको बुझ्न सकिन्छ ।