नेपालमै पहिलो पटक ‘अन्तर्राष्ट्रिय फिटनेस एक्सपो’ आयोजना हुँदै

१८ साउन, काठमाडौं । फिटनेसलाई शिक्षाको रूपमा प्रवर्द्धन गर्ने उद्देश्यले स्थापना गरिएको क्लासिक फिटनेस एकेडेमीले नेपालमै पहिलोपटक अन्तर्राष्ट्रिय फिटनेस प्रदर्शनी अर्थात् ‘फिटनेस एक्स्पो, २०८२’ आयोजना हुने भएको छ ।

फिटनेससम्बन्धी बिजनेस कनेक्सन र नेटवर्किङ ग्रोथ गर्न क्लासिक फिटनेसको आयोजना तथा रिगल इभेन्टको व्यवस्थापनमा आगामी भदौ १४ गतेदेखि होटेल मल्लमा अन्तर्राष्ट्रियस्तरको फिटनेस प्रदर्शनी आयोजना हुन लागेको हो ।

‘क्लासिक फिटनेस एकेडेमीद्वारा प्रस्तुत गरिने ‘नेपाल फिटनेस एक्स्पो, २०८२’ नेपालकै पहिलो अन्तर्राष्ट्रियस्तरको फिटनेस प्रदर्शनी हो,’ आयोजक संस्था क्लासिक फिटनेस एकेडेमीका संस्थापक रोजल शाहीले भने, ‘क्लासिक फिटनेस एकेडेमीले गर्वका साथ नेपाल फिटनेस एक्स्पो घोषणा गरेको छ । जुन नेपालमै पहिलो पटक आयोजना हुन लागेको अन्तर्राष्ट्रियस्तरको फिटनेस प्रदर्शनी हो ।’

यो एक्स्पो केवल फिटनेससम्बन्धी सामग्री र सेवाहरूको प्रदर्शनी मात्र नभई व्यावसायिक सञ्जाल विस्तार गर्ने प्लेटफर्म समेत भएको उनले बताए । यसले नेपाली फिटनेस उद्योगलाई व्यावसायिक रूपमा बलियो बनाउने र अन्तर्राष्ट्रियस्तरमा पुर्‍याउने उद्देश्य राखेको जानकारी दिँदै उनले एक्स्पोमा ब्राण्ड प्रदर्शनी, पोषण, उपकरण, पोशाक र यससम्बन्धी सेवाहरूबारे राष्ट्रिय तथा अन्तर्राष्ट्रिय कम्पनीहरूको सहभागिता रहने जानकारी दिए ।

उनका अनुसार एक्स्पोमा फिटनेस अवार्ड शो पनि गरिने छ । राइजिङ एथलेटिक, बेष्ट एथलेटिक, बेष्ट कोच र लाइफटाइम एचिभमेन्ट गरी प्रमुख चार विधामा उक्त सम्मान प्रदान गरिने छ ।

भारत,  मलेसिया तथा अन्य एसियाली मुलुकहरूबाट प्रसिद्ध फिटनेस इन्फ्लुएन्सरहरू र व्यावसायिक प्रतिनिधिहरू यस कार्यक्रममा सहभागी हुने भएका छन्, जसले एक्स्पोलाई अझ विशेष बनाउने छ । फिटनेस इन्फ्लुएन्सरहरू र व्यावसायिक प्रतिनिधिहरूबाट फिटनेससम्बन्धी संक्षिप्त ट्रेनिङहरू र विशेषज्ञहरूबाट निस्शुल्क स्वास्थ्य परामर्श उपलब्ध गराइने छ ।

करिब तीन हजार जनाले अवलोकन गर्ने लक्ष्य राखिएको एक्स्पोमा फिटनेससँग चासो राख्नुहुनेहरू, प्रशिक्षक, खेलाडी, व्यवसायी र विभिन्न ब्राण्डका प्रतिनिधिहरूको उल्लेख्य सहभागिता रहनेछ ।

नेपाली फिटनेस उद्योगलाई अन्तर्राष्ट्रिय स्तरमा लैजानु, स्थानीय तथा अन्तर्राष्ट्रिय ब्रान्डहरूबीच साझेदारी र लगानीको अवसर सृजना गर्नु, फिटनेस, स्वास्थ्य र जीवनशैलीको क्षेत्रमा जनचेतना अभिवृद्धि गर्नु हो । यो एक्स्पोमा प्रदर्शनी मात्र नभई फिटनेस शो, योगा, डेमो ट्रेनिङ र अन्य मनोरञ्जनात्मक प्रस्तुतिहरू समेत समावेश गरिँदै छ, जसले सम्पूर्ण इभेन्टलाई अझ जीवन्त बनाउने अपेक्षा गरिएको छ ।