प्रधानमन्त्रीको गैरजिम्मेवार अभिव्यक्ति, भने- समावेशिता कुनै कामको कुरा होइन

News Summary

Generated by OK AI. Editorially reviewed.

प्रधानमन्त्री केपी शर्मा ओलीले समावेशी प्रणालीबारे गैरजिम्मेवार अभिव्यक्ति दिएका छन्।
उनले समावेशितालाई राजनीतिक पदमा पुग्नका लागि मात्र काम लाग्ने बताए।
ओलीले कोस्टरिकासँगको वार्तामा महिलाको संख्या उदाहरण दिँदै संविधानमा उल्लेख समावेशिता कार्यान्वयन नहुने तर्क गरे।

१८ साउन, काठमाडौं । प्रधानमन्त्री केपी शर्मा ओलीले समावेशी प्रणालीबारे गैरजिम्मेवार अभिव्यक्ति दिएका छन् ।

राजधानीमा आयोजित एक कार्यक्रममा प्रधानमन्त्री ओलीले समावेशिताबारे बहकिएर कुरा गर्ने गरिएको बताएका हुन् । ‘हामी बहकिएर पनि कुरा गर्छौ कहिले कहिले । इन्क्लुसिभनेस आदि इत्यादी हामीले टेम्पोररी व्यवस्था गरेको हो’, ओलीले भनेका छन् ।

समावेशी राजनीतिक पदमा पुग्नलाई मात्र काम लाग्ने उनले बताएका छन् । ‘समावेशिताबाट डाक्टर हुन्छ ? इन्जिनियर हुन्छ ? यो समावेशिता भनेको पोलिटिकल पदमा पुग्नका लागि मात्रै हो, कुनै कामको कुरा होइन’, ओलीले भनेका छन् ।

उनले समावेशी व्यवस्था संविधानमा उल्लेख समावेश‍िता कार्यान्वयन नहुने तर्क गरेका थिए । त्यसका निम्ति कोस्टरिकासँग भएको एउटा वार्ताको दृष्य उल्लेख गरेका छन् ।

‘मैले कोस्टरिका हेरेको छु । हाम्रो डेलिगेसनमा दुई तीन जना महिलाहरु हुनुहुन्थ्यो वार्ता गर्दाखेरी’ उनले भने, ‘उहाँहरुको ८ जना महिला थियो । दुई जना मात्रै पुरुष थियो । त्यो संविधानमा इन्क्लुसिभ राखेर होइन । इन्क्लुसिभले ८ जना महिला पुर्याउँछ र ? इन्क्लुसिभले ८ जना पुर्‍याउँदैन । धेरै भएको भए ५ जना पुर्‍याउँथ्यो ।’