कांग्रेसले थाल्याे ‘प्राकृतिक स्रोत मीमांसा’ कार्यक्रम

१९ साउन, काठमाडौं । नेपाली कांग्रेसको प्राकृतिक स्रोत विभागले प्राकृतिक स्रोत मीमांसा कार्यक्रम सुरु गरेको छ ।

‘जडीबुटी विशेष : बालीदेखि बजार’सम्म शीर्षकमा प्राकृतिक स्रोत मीमांसाको पहिलो कार्यक्रम विभागले गरेको हो ।

कार्यक्रममा जडीबुटी क्षेत्रको उत्पादन, संकलन, प्रशोधन र बजार प्रवर्द्धनका विषयमा गहन छलफल भएको आयोजकले जनाएको छ ।

जडीबुटी किसान, संकलक, निजी औषधि उत्पादक, सरकारी उत्पादक, जडीबुटी उत्पादन कम्पनी लि. का प्रतिनिधि सहित विज्ञहरुको सहभागितमा कार्यक्रम सम्पन्न गरिएको थियो ।

नेपाली कांग्रेसका उपसभापति धनराज गुरुङ, रमा कोइराला, कुसुम थापा, लीला बोखिम र बीना कुमारी ठनौतको उपस्थिति रहेको कार्यक्रममा रहेको थियो ।

छलफलले जडीबुटी क्षेत्रको सम्भावना, चुनौती र नीतिगत सुधारमा जोड दिएको आयोजकको भनाइ छ ।

‘नेपालमा प्रशस्त मात्रामा जडीबुटी पाइन्छ । वनमा पनि धेरै छ । तर, सबै कुहिएर जान्छ ।

नीतिगत समस्याका कारण उपयोग हुनसकेको छैन । त्यसैले यी कुराको समस्या कसरी समाधान गर्न सकिन्छ र जडीबुटीको भरपुर उपयोग कसरी गर्न सकिन्छ भनेर छलफल भयो,’ विभाग सचिव नवराज त्रिपाठीले भने ।

त्यस्तै, विभाग प्रमुख तारामान गुरुङले भने, ‘हाम्रो यो विभाग संगठन विस्तारको लागि भन्दा पनि नीतिगत कामको लागि हो । यस्ता विषयमा हामी निरन्तर छलफल र नीतिगत पहल गर्नेछौँ ।’