नेपाली छोटो फिल्म ‘कलर अफ टी’ ग्रीसको फेस्टिभलमा पुरस्कृत

News Summary

Generated by OK AI. Editorially reviewed.

ग्रीसमा आयोजित १२ औं अन्तर्राष्ट्रिय वृत्तचित्र महोत्सव इरापेट्रा एन्ड अवाड्र्समा नेपाली छोटो फिल्म 'कलर अफ टी' पुरस्कृत भएको छ।
फिल्म 'कलर अफ टी'ले मधेशका दलित आदिवासीको जातीय भेदभाव विरुद्धको मौन विद्रोहको कथा भन्छ।
लेखक राज सरगमको फिल्मले कोरियाको अन्तर्राष्ट्रिय फिल्म महोत्सवमा उत्कृष्ट पुरस्कार जितेको र जर्मनीको महोत्सवमा क्वार्टर फाइनल पुगेको छ।

काठमाडौँ । ग्रीसमा आयोजित ‘१२ औं अन्तर्राष्ट्रिय वृत्तचित्र महोत्सव इरापेट्रा एन्ड अवाड्र्स’मा नेपाली छोटो फिल्म ‘कलर अफ टी’ पुरस्कृत भएको छ ।

महोत्सवले वेबसाइटमा आधिकारिक रूपमा पुरस्कृत फिल्मको सूची सार्वजनिक गर्दै लेखेको छ, ‘दोस्रो महोत्सव पुरस्कार राज सरगम (नेपाल)द्वारा लिखित तथा निर्देशित अन्तर्राष्ट्रिय छोटो फिल्म ’कलर अफ टी’लाई जान्छ ।
१२ औं अन्तर्राष्ट्रिय वृत्तचित्र महोत्सव इरापेट्रा एन्ड अवाड्र्सले ग्रीसमा विश्वभरका उत्कृष्ट लामा र छोटा वृत्तचित्र र लघु चलचित्रलाई आफ्नो प्रतिस्पर्धात्मक खण्डमा प्रदर्शनको लागि प्रवर्धन गर्दछ ।

’कलर अफ टी’ले मधेशका ती दलित आदिवासीको कथा भन्छ जो जातीय भेदभावलाई निरन्तरता दिने सूक्ष्म आक्रमकता र हिंसाविरुद्व मौन विद्रोह गर्दछ ।

लेखक तथा पत्रकार राजको यही फिल्मले गत जुलाईमा कोरियामा दिगो विकास लक्ष्य २०२५ को लागि ’कोरिया ग्योङ्गी अन्तर्राष्ट्रिय फिल्म महोत्सव’मा उत्कृष्ट पुरस्कार जितेको थियो ।

साथै, यो फिल्म जर्मनीमा सेप्टेबरमा हुने ’कोबानी अन्तर्राष्ट्रिय फिल्म महोत्सव’मा क्वार्टर फाइनलमा पुग्न सफल भएको छ ।