सहकर्मीमाथि कुटपिटको विरोधमा बटेश्वर गाउँपालिकाका स्वास्थ्यकर्मी धर्नामा

News Summary

Generated by OK AI. Editorially reviewed.

धनुषाको बटेश्वर गाउँपालिकाका स्वास्थ्यकर्मीहरू सहकर्मीमाथि कुटपिटको विरोधमा पाँचदिनदेखि धर्ना बसेका छन्।
साउन २३ गते शान्तिपुर स्वास्थ्य चौकीमा सुनिता सिंहमाथि हातपात भएपनि दोषीमाथि कारबाही नभएको भन्दै धर्ना सुरु गरिएको हो।
तीन बुँदे मागमा दोषीमाथि कारबाही, सुरक्षाको ग्यारेन्टी र भयरहित वातावरणमा काम पाउनुपर्ने कुरा राखिएको छ।

६ भदौ, काठमाडौं । सहकर्मीमाथि कुटपिटको विरोधमा धनुषाको बटेश्वर गाउँपालिकाका स्वास्थ्यकर्मीहरू पाँचदिनदेखि धर्ना बसेका छन् ।

गत साउन २३ गते बटेश्वर गाउँपालिका-५ शान्तिपुर स्वास्थ्य चौकीमा कार्यरत सुनिता सिंहमाथि हातपात भएपनि दोषीमाथि कारबाही नभएको भन्द‌ै गत सोमबारदेखि कामकाज ठप्प गरेर धर्ना बसेका हुन् ।

स्थानीय दारा सिंह, अली हुसैन र रवि मण्डलले हातपात गरेको आरोप कर्मचारीहरूको छ ।

शान्तिपुर स्वास्थ्य चौकीका इन्चार्ज राजकुमार महतोका अनुसार घटना पश्चात् जिल्ला प्रशासन कार्यालय धनुषा र जिल्ला प्रहरी कार्यालय धनुषामा दोषीहरूलाई कारबाहीको माग गर्दै ज्ञापनपत्र बुझाएको थियो ।

इलाका प्रहरी कार्यालय सखुवा महेन्द्रनगरमा जाहेरी समेत परेपनि दर्ता नभएको र कारबाही नगरिएको भन्दै धर्ना बस्नु परेको कर्मचारीहरूको भनाइ छ ।

तीन बुँदे माग राख्दै गाउँपालिकाका सर्म्पूण स्वास्थ्यका कर्मचारी गत सोमबारदेखि हातपात गर्नेमाथि कारबाही गर्नुपर्ने, सुरक्षाको ग्यारेन्टी हुनुपर्ने र भयरहित वातावरणमा काम गर्न पाउ माग गर्दै शान्तिपुर स्वास्थ्यचौकीमा धर्ना बस्दै आएका छन् ।

शान्तिपुर स्वास्थ्य चौकीका इन्चार्ज महतोका अनुसार वास्थ्य चौकीको मुल ढोकामै रहेको पिपलको बोट सार्ने विषयमा आरोपितहरूले हातपात गरेका थिए ।