५० दिन हिरासत बस्दा रवीन्द्र मिश्रले लेखे ३५ कविता, २८ गते सार्वजनिक गर्ने

News Summary

Generated by OK AI. Editorially reviewed.

राप्रपाका वरिष्ठ उपाध्यक्ष रवीन्द्र मिश्रले हिरासतमा लेखेका ३५ कविताहरूको संग्रह \'माथिको आदेश छ\' भदौ २८ गते सार्वजनिक गर्ने भएका छन्।
मिश्रले ५० दिन हिरासतमा बसेर लेखेका कविताहरूलाई \'हिरासतको \'म\'का आवाज, आवेग र आर्तनाद\' भनेका छन्।
उनको यो दोस्रो कविता संग्रह हो।

९ भदौ, काठमाडौं । राप्रपाका वरिष्ठ उपाध्यक्ष एवं पूर्वपत्रकार रवीन्द्र मिश्रले हिरासत बसेका बेला लेखेका कविताहरूको संग्रह भदौ २८ गते सार्वजनिक गर्ने भएका छन् ।

गत चैत १५ गतेको राजावादी आन्दोलनपछि पक्राउ परेका मिश्रले ५० दिन हिरासत बस्दा लेखेका कविताहरू संग्रहित गरी ‘माथिको आदेश छ’ नामक पुस्तक सार्वजनिक गर्न लागेका हुन् ।

मिश्रले आफ्नो कविता संग्रह हिरासतसँगको बाध्यात्मक संसर्गबाट जन्मिएका सन्तान भएको बताए । ‘यी कविता ‘हिरासतको ‘म’का आवाज, आवेग र आर्तनाद हुन्,’ उनले भनेका छन् ।

‘५० दिन हिरासतमा बस्दा मलाई ३५ वटा कविता फुरेछन् । कविताको सोच दिमागमा आउनु सामान्य हो तर, त्यो सोच कविताको स्वरूपमा अभिव्यक्त हुनु असामान्य हो । हिरासत बसाइँमा मलाई निरन्तर रूपमा कविताका सोचहरू दिमागमा फुरेछन् र तिनलाई मैले कवितामा रुपान्तरण गर्न सकेछु,’ कविताबारे उनले भनेका छन् ।

छोटो अवधिमा आफूले धेरै कविता नलेखेको भन्दै मिश्रले हिरासतमा एकै दिन दुई वटा सम्म कविता लेखेको बताए ।

मिश्रको यो दोस्रो कविता संग्रह हो । उनको पहिलो कविता संग्रह ‘रवीन्द्र मिश्रका कविता’ २०७१ सालमा प्रकाशन भएको थियो । मिश्रको कविता संग्रह फाइन प्रिन्टले प्रकाशन गरेको हो ।