रास्वपा नेता पाँडेविरुद्ध मुद्दा दर्ता, न्यायाधीश कार्कीको इजलासमा बयान सुरु

१३ भदौ, काठमाडौं । राष्ट्रिय स्वतन्त्र पार्टी (रास्वपा) केन्द्रीय सदस्य डा. अरनिको पाँडेविरुद्ध मुद्दा दर्ता भएको छ । प्रहरीले बुझाएको अनुसन्धान प्रतिवेदनका आधारमा जिल्ला सरकारी वकिल कार्यालयले काठमाडौं जिल्ला अदालतमा मुद्दा दर्ता गरेको हो ।

न्यायाधीश ध्रुवराज कार्कीको इजलासमा पाँडेको बयान सुरु भएको छ । बयान सकिएपछि थुनछेक बहस हुनेछ । त्यसपछि पुर्पक्षका लागि कारागार पठाउने वा साधारण तारेख तथा धरौटीमा छाड्ने मध्ये एक आदेश आउने छ । सम्भवत आजै थुनछेक बहस सकिने सम्भावना रहेको छ ।

बुधबार साँझ पाँडेलाई प्रहरीको केन्द्रीय साइबर ब्यूरो भोटाहिटीले पक्राउ गरेको थियो । उनीविरुद्ध विद्युतीय कारोबार ऐन अन्तर्गतको कसुरमा मुद्दा दर्ता भएको हो ।

बिहीबार मात्रै चार दिन हिरासतमा राखेर अनुसन्धान गर्न अदालतले म्याद दिएको थियो । तर पाँडेलाई हिरासत राखेको भन्दै आलोचना समेत भएको थियो ।

एकै प्रकृतिका मुद्दामा एमाले नेता ऐन महरालाई हाजिरी जमानीमा छाडेको तर पाँडेलाई भने हिरासतमा राखेको भन्दै विरोध हुन थालेपछि फास्ट ट्रयाकमै पाँडेविरुद्ध मुद्दा दर्ता भएको स्रोतले बतायो ।

पाँडेले बेलायत बस्ने एक महिलालाई इमेल र ह्वाट्स एपमार्फत अपशब्द बोल्दै गाली गरेको आरोप छ । ती महिला नेपाल आएको बेलामा उजुरी दिएपछि पाँडेलाई प्रहरीले पक्राउ गरेको हो ।

पाँडेविरुद्ध उजुरी दिने महिला र पाँडे पूर्व चिनजानकै व्यक्तिहरु रहेको प्रहरीले बताएको छ । कुनै विषयमा उनीहरुबीच सम्बन्ध बिग्रिएपछि पाँडेले गाली गरेको आरोप छ ।

वातावरणविद् भनेर चिनिने पाँडे २०७९ साल भदौमा रवि लामिछाने नेतृत्वको राष्ट्रिय स्वतन्त्र पार्टीमा प्रवेश गरेका थिए । उनी रास्वपा सरकारमा रहेको बेलामा २०८० सालमा राष्ट्रिय योजना आयोगको सदस्य समेत बनेका थिए ।