रुबी हत्या आरोपी लक्ष्मणको शव उठेन, बुबाले मेयरसँग मागे आर्थिक सहयोग

१३ भदौ, रौतहट । रौतहटकी रुबी साहका हत्या आरोपी लक्ष्मण पासवानको शव कीर्तिपुर बर्न अस्पतालबाट घर ल्याउन समस्या परेको छ । आर्थिक अभावका कारण शव उठाउन नसकिएको लक्ष्मणका बुवा जयनाथ पासवानले बताएका छन् ।

रौतहट माधवनारायण नगरपालिका-६ माधोपुरका लक्ष्मण पासवानले आफ्नै शरीरमा आगो लगाएर आत्मदाह गरेका थिए । उपचारको क्रममा कीर्तिपुर वर्न अस्पतालमा उनको ज्यान गएको थियो ।

पैसा नभएका कारण मृत्यु भएको दुई दिन बितिसक्दा पनि छोराको शव ल्याउन नसिकएको भन्दै बुबा जयनाथले जनप्रतिनिधिहरूसँग आर्थिक सहयोग मागेका छन् ।

काठमाडौंस्थित कीर्तिपुर बर्न अस्पतालबाट छोराको शव घरसम्म ल्याउने खर्च जुटाउन नसक्दा पीडा भएको जयनाथले बताए ।

‘छोरालाई उपचारका लागि काठमाडौं लगिएको थियो । त्यहीँ मृत्यु भयो । अब शव ल्याउन हामीसँग पैसा छैन,’ जयनाथले भने, ‘छोराको शव ल्याउन मेयर साहेबसँग आर्थिक सहयोग मागेको छु ।’

माधवनारायण नगरपालिकाका मेयर बैजनाथ यादवले लक्ष्मणको शव ल्याउन आफूले सहयोग गर्ने बताए ।

‘निकै दुःखद घटना भएको छ । लक्ष्मणको शव परिवारजनसम्म पुर्‍याउन सक्दो सहयोग गर्छु भनेको छु,’ मेयर यादवले भने, ‘उनको परिवारको अवस्था निकै नाजुक छ ।’

रुबीको शव गत शनिबार राति गौर-९ मा मुडवलवा गेट अगाडि सुटकेसमा फेला परेको थियो । त्यसपछि रुबी हत्याका आरोपी लक्ष्मण पासवानले आफ्नै शरीरमा आगो लगाएका थिए ।

शरीरमा आगो लागेर गम्भीर घाइते भएका उनलाई प्रहरीले उद्धार गरी उपचारमा पठाए पनि उपचारकै क्रममा ज्यान गएको थियो ।

आफूलाई आगो लगाउनुभन्दा पहिले लक्ष्मणले ९ मिनेटको भिडियो सार्वजनिक गर्दै आफूले रुबीको हत्या गरेको स्वीकार गरेका थिए ।

यो पनि पढ्नुहोस

रुबी हत्या प्रकरण : लक्ष्मणको मृत्युले अनुसन्धान फाइल बन्द हुने जोखिम