रास्वपासँग सरकारले संवाद नगरेकोमा सभामुख चिन्तित

News Summary

Generated by OK AI. Editorially reviewed.

सभामुख देवराज घिमिरेले संसदमा रहेका चौथो र पाचौं दलले लामो समयदेखि प्रतिनिधिसभाको कामकारबाहीमा भाग नलिएकोप्रति सरकार गम्भीर हुनुपर्ने बताएका छन्।
घिमिरेले भिजिट भिसा प्रकरणको छानबिनको माग राखेर सांसदहरू नियमित बैठकमा सहभागी नभएको उल्लेख गर्दै सहमतिका लागि आफू सक्रिय रहेको बताए।
सभामुखले रास्वपा र राप्रपासँग सरकारले संवाद नगरेको र संसदको कामकारबाहीमा भाग नलिनु दिर्घकालीन रुपमा हानिकारक हुन सक्ने बताएका छन्।

१३ भदौ, काठमाडौं । सभामुख देवराज घिमिरेले संसद्‌मा रहेका चौथो र पाचौं दलले लामो समयदेखि प्रतिनिधिसभाको कामकारबाहीमा भाग नलिएकोप्रति सरकार गम्भीर हुनुपर्ने बताएका छन् ।

शुक्रबार प्रतिनिधिसभाको बैठक सुरु भएलगत्तै सुरुमै सभामुख घिमिरेले यस्तो बताएका हुन् ।

भिजिट भिसा प्रकरणको छानबिनको माग राखेर लामो समयदेखि प्रतिपक्षी बेन्चमा रहेका सांसदहरू नियमित बैठकमा सहभागी नभएको उल्लेख गर्दै उनले भने, ‘यस सम्बन्धमा म आफौले सहमतिका लागि सम्भाव्य सबै पहल र संवादको मार्ग अपनाएको बारे सबै माननीय सदस्यहरू जानकार नै हुनुहुन्छ ।’

सहमतिका लागि आफू अझै पनि सक्रिय रहेको उनले बताए । यहीँनेर उनले संसदको कामकारबाहीमा भाग नलिइरहेको राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)सँग सरकारले संवाद नगरेको बताएका हुन् ।

‘तर, सदन सुचारु बनाउन सरकार र राजनीतिक दलहरूबीच हुनुपर्नेमा नभएकोमा मलाई चिन्ता लागेको छ,’ सभामुख घिमिरेले भने ।

बैठक सुरु हुनासाथ असहमति प्रकट गर्ने र बाहिरिने प्रवृति दिर्घकालीन रुपमा हानिकारक हुन सक्ने उनले बताए । संसद असहमति प्रकट गर्ने थलो मात्रै नभएर सहमति गर्ने थलो समेत रहेको उनले बताए ।