देउवा र खड्काको घरमा भेटिएको पैसाबारे बुझ्न पुग्यो सम्पत्ति शुद्धीकरण विभागको टोली

५ भदौ, काठमाडौं । नेपाली कांग्रेसका सभापति शेरबहादुर देउवा र कांग्रेसकै नेता तथा पूर्वमन्त्री दीपक खड्काको घरमा सम्पत्ति शुद्धीकरण विाभगको टोली पुगेको छ ।

हरिहर भवनस्थित विभागबाट एसपी नवरत्न पौडेलसहितको टोली आइतबार उनीहरूको घरमा पुगेको उच्च स्रोतले अनलाइनखबरलाई जानकारी दिएको छ ।

‘टोलीले आज मुचुल्का उठाउने काम गरेको छ । अन्य काम पनि अघि बढाइरहेका छौं,’ विभाग स्रोतले भन्यो ।

जेनजी आन्दोलनका क्रममा यी दुवै नेताको घर प्रदर्शनकारीले जलाएका थिए । उक्त घरमा ठूलो मात्रामा नगद रकम रहेको भन्दै भिडियोसमेत सार्वजनिक भएको थियो ।

बुढानीलकण्ठस्थित देउवाको घरमा डलर र नेपाली हजार, पाँच सयका नोटहरूका जलेको टुक्राहरू समेत भेटिएको थियो । पैसा राख्ने सुरुङ समेत भेटिएको दाबी गरिएको थियो ।

यता पूर्वऊर्जामन्त्री दीपक खड्काको घरबाट पनि केही रकम भेटिएको भिडियो सार्वजनिक भएको थियो । मन्त्री खड्काको घरमा रहेको भन्दै केही रकम उड्दै गरेका भिडियो बाहिरिएका थिए । रकम भेटिएको भिडियोहरू सार्वजनिक भएपछि आज विभागको टोली मुचुल्का गरेको हो ।

जलेको घर र त्यसको अवस्था, रकम रहेको ठाउँ लगायतको मुचुल्का भएको छ । त्यसपछि यो विषयमा अनुसन्धान गरिने विभाग स्रोतले बतायो । घटनाको ११ दिनपछि विभागको टोली गएर मुचुल्का गरेको छ ।

यता देउवाको सचिवालयले विज्ञप्ती जारी रकम राख्ने सुरुङ र पैसा नभएको दाबी गरेको थियो । उक्त सुरुङ नभइ पानी ट्यांकी रहेको दाबी देउवाको सचिवालयको थियो ।