‘सिन्धुली गढी घुमेर हेर्दा’ गीतले पायो ४६ वर्षपछि पुनर्जीवन

News Summary

Generated by OK AI. Editorially reviewed.

कालजयी गीत ‘सिन्धुली गढी घुमेर हेर्दा’ ४६ वर्षपछि रिमेक गरी युट्युबमा पुनः सार्वजनिक भएको छ।
यो गीत २०३६ सालमा रेडियो नेपालमा रेकर्ड भई पहिलो पुरस्कार जितेको थियो र कृष्णविक्रम थापाले शब्द, संगीत र स्वर दिएका थिए।
रिमेक भिडियोमा रमेश विश्वकर्मा र दीप्सा कार्कीको अभिनय छ भने निर्देशन क्रान्ति केसीले गरेका छन्।

काठमाडौं । कालजयी गीत ‘सिन्धुली गढी घुमेर हेर्दा’ले पुनर्जीवन पाएको छ । रिमेक गर्दै यो गीत पुनः युट्युबमा सार्वजनिक भएको छ ।

२०३६ सालमा रेडियो नेपालमा रेकर्ड भई पहिलो पुरस्कार जित्न सफल भएको यो गीतलाई ४६ वर्षपछि नयाँ स्वरुपमा सार्वजनिक गरिएको हो ।

कृष्णविक्रम थापाको शब्द, संगीत र स्वर रहेको यो कालजयी गीतलाई राजु थापाले रिमेक गरेका हुन् । पुनः संयोजन रुविन श्रेष्ठले गरेका छन् ।

संगीतकार थापा स्वर्गीय कृष्णविक्रम थापाका जेठा छोरा हुन् । यो गीतमा शब्द, संगीत र स्वर कृष्णविक्रम थापाले दिएका थिए ।

यो गीत आमनेपालीको जिब्रोमा झुन्डिएको थियो । सिन्धुलीको ऐतिहासिक र सांगीतिक पहिचान बोकेको यस गीतको भिडियो छायांकन पनि सिन्धुली जिल्लाकै रमणीय स्थानमा गरिएको हो ।

रिमेक भिडियोमा रमेश विश्वकर्मा र दीप्सा कार्कीको अभिनय छ । बासु बरालको छायांकन रहेको भिडियोको निर्देशन क्रान्ति केसीले गरेका छन् ।

४ दशकभन्दा लामो अन्तरालपछि पुनर्जीवित यस गीतले नयाँ पुस्तालाई सिन्धुलीको सांगीतिक धरोहरसँग फेरि नजिक ल्याउने अपेक्षा गरिएको छ ।