सुनकोशी मरिन र भेरी बबईका ठेक्का तोड्ने सरकारको चेतावनी

७ असोज, काठमाडौं । ऊर्जा, जलस्रोत तथा सिँचाइमन्त्री कुलमान घिसिङले राष्ट्रिय गौरवका दुई आयोजना सुनकोशी मरिन र भेरी बबई बहुउद्देश्यीय आयोजनाको ठेक्का तोड्ने चेतावनी दिएका छन् ।

उनले यी दुई आयोजनाको ठेक्का यथास्थितिमा राख्न नसकिने बताए । ऊर्जा मन्त्रालयमा मंगलबार मन्त्रालयका सचिव, सिँचाइ विभागका महानिर्देशक, दुवै आयोजनाका प्रमुख, परामर्शदाता र निर्माण व्यवसायीसँग मन्त्री घिसिङले छलफल गरी आयोजनाका ठेक्का तोडेर नयाँ सिराबाट अगाडि बढ्नुको विकल्प नभएको बताए ।

दुवै आयोजना निर्माणमा अस्वाभाविक ढिलाइ भएपछि मन्त्री घिसिङले निर्माणमा संलग्न सबै पक्षसँग छलफल गरेका हुन् । तराई क्षेत्रमा सिँचाइ पुर्‍याएर कृषि उत्पादकत्व वृद्धि गरी मुलुकको अर्थतन्त्रमा योगदान पुर्‍याउने आयोजना निर्माणमा भइरहेको अस्वाभाविक ढिलाइले आयोजनाबाट प्राप्त हुने प्रतिफल गुमिरहेको उल्लेख गर्दै उनले सम्बन्धित सबै पक्षलाई गम्भीर हुन आग्रह गरे ।

‘एक पक्षले अर्को पक्षलाई दोष देखाएर बसेको देखिन्छ, निर्माण व्यवसायी छिद्र खोज्दै बस्ने आयोजना त्यस्तो वातावरण दिइराख्ने यस्तो अवस्थामा निर्माण कसरी अगाडि बढ्छ ?,’ उनले भने,  ‘राज्यको अर्बौं लगानी भइसकेको छ, ब्याजको मात्र हिसाब गर्ने हो भने अर्बौं हुन्छ, यस्तो अवस्थामा आयोजना सुरु गर्दा गरिएको वित्तीय विश्लेषण कहाँ पुग्यो, प्रतिफलको अवस्था के भयो ?’

दुवै आयोजनाका सुरुङ निर्माण सम्पन्न भइसके पनि बाँध, विद्युत्गृह लगायत संरचना बनाउन नसक्दा आयोजना अलपत्र परेको उनले बताए ।

‘तराई/मधेशमा सिँचाइका लागि पानीको हाहाकार छ, तसर्थ यो स्थितिमा आयोजना चल्न सक्दैनन्,’ मन्त्री घिसिङले भने, ‘निर्माण व्यवसायी सक्रिय भएको भए काम सकिन्थ्यो, काम गर्ने नियतमा देखिँदैन, त्यसकारण म्याद थप गर्नुको औचित्य छैन, सबै ठेक्का तोडी अगाडि बढौं ।’

भेरी बबईको सुरुङ भदौ २०७७ मा निर्माण सम्पन्न भएको थियो । बाँध तथा विद्युत्गृह निर्माणका लागि साउन २०७६ मा गङ्दोङ युतियान—रमण जेभीसँग ठेक्का सम्झौता भएको थियो । आयोजनाको भौतिक प्रगति ५७ प्रतिशत छ ।

सुनकोशी मरिन बाँध, विद्युत्गृह लगायत संरचना निर्माणको प्रगति १० प्रतिशत छ । ठेक्का समयावधि करिब ६० प्रतिशत बितिसकेको छ । यस आयोजनाको निर्माण व्यवसायी पटेल–रमण जेभी हो ।