तुइनखोलाको पहिरो पन्छाउने काम ६० प्रतिशत सकियो, आज रातिसम्म सडक सञ्चालनमा आउने अपेक्षा

News Summary

Generated by OK AI. Editorially reviewed.

मुग्लिन-नारायणगढ सडकखण्डको तुइनखोला नजिकै खसेको पहिरो पन्छाउने काम ६० प्रतिशत सकिएको सडक डिभिजन भरतपुरले जनाएको छ।
पहिरो पन्छाउन नारायणगढतर्फ २ र मुग्लिनतर्फ ३ गरी ५ वटा उपकरण प्रयोग भएका छन् र दुवैतर्फ १/१ वटा उपकरण तयारी अवस्थामा राखिएको छ।
ठूला ढुंगाका कारण पहिरो पन्छाउन कठिनाइ भए पनि आज रातिसम्म पूर्ण रूपमा पहिरो हटाएर आवागमन सञ्चालनमा ल्याउने अपेक्षा गरिएको छ।

९ असोज, काठमाडौं । मुग्लिन-नारायणगढ सडकखण्ड अन्तर्गत तुइनखोला नजिकै खसेको पहिरो पन्छाउने काम ६० प्रतिशत सकिएको छ ।

बिहीबार दिउँसो पौने तीन बजेसम्म करिब ६० प्रतिशत पहिरो पन्छाउने काम सकिएको सडक डिभिजन भरतपुरले जनाएको छ ।

पहिरो पन्छाउनका लागि नारायणगढ तर्फ २ र मुग्लिन तर्फ ३ गरी ५ वटा उपकरणहरू प्रयोग भएका छन् । साथै दुवैतर्फ १/१ वटा उपकरण तयारी अवस्थामा राखिएको सडक डिभिजन भरतपुरले जनाएको छ ।

काम गर्ने क्षेत्र साँघुरो भएकोले गर्दा एक पटकमा दुवै तर्फ ५ वटा उपकरणले मात्रै पहिरो हटाउने काम भइरहेको हो ।

नारायणगढ साइडतर्फ ठूलाठूला ढुंगाहरू भेटिएका कारण पहिरो पन्छाउन केही कठिनाइ भएता पनि प्रयोग भएका उपकरणले पूर्ण क्षमतामा काम गरिरहेको छ ।

सडकमाथिबाट खसेको पहिरोको थुप्रोमा ढुंगाहरूको मात्रा बढी भएको र स-साना तिखा ढुंगाका कारण उपकरणका टायर पन्चर हुने, ढुंगाले लागेर अपरेटर घाइते हुने जस्ता समस्याले गर्दा सोचे अनुसारको प्रगति हुन नसकेको सडक डिभिजनको भनाइ छ । हेटौंडा र डुम्रेबाट थप दुई जना अपरेटर झिकाइएर कामलाई निरन्तरता दिइएको छ ।

काममा कुनै बाधा आइनपरे सम्भवतः आज रातिसम्म पूर्ण रूपमा पहिरो हटाएर आवागमन सञ्चालनमा ल्याउने अपेक्षा सडक डिभिजन भरतपुरको छ ।