माओवादी केन्द्रीय समिति बैठकमा प्रचण्डको प्रस्तावमाथि समूहगत छलफल

 ९ असोज, काठमाडौं । नेकपा माओवादी केन्द्रको आजदेखि सुरु भएको केन्द्रीय समिति बैठकमा अध्यक्ष पुष्पकमल दाहाल प्रचण्डले राखेको प्रस्तावमा समूहगत छलफल हुने भएको छ ।

जेनजी प्रदर्शनपछि विकसित घटनाक्रमलाई मध्यनजर गर्दै आन्तरिक छलफलमा जुटेको माओवादीले काठमाडौंस्थित प्रज्ञा भवनमा बिहीबार केन्द्रीय समिति बैठक डाकेको हो ।

बैठकमा अध्यक्ष प्रचण्ड राजनीतिक तथा संगठनात्मक प्रस्ताव पेश गरेका छन् ।

यस्तै वरिष्ठ उपाध्यक्ष नारायणकाजी श्रेष्ठ समेत र उपमहासचिव जनार्दन शर्माले जेनजी आन्दोलनपछि नेतृत्व परिवर्तनमा जोड दिँदै आएका छन् ।

श्रेष्ठ र शर्माले राखेको असहमति प्रस्तावमा समेत समूहगत छलफल हुनेछ । छलफलका लागि १० वटा समूह बनाइएको एक नेताले अनलाइनखबरलाई जानकारी दिए ।

उनका अनुसार बागमती, मधेश, गण्डकी, कोशी, मधेश, सुदूरपश्चिमसहित सात प्रदेश र उपत्यका विशेष प्रदेश, सम्पर्क विशेष प्रदेश तथा प्रवास विशेष प्रदेश/आयोग सदस्य सम्मिलित १० समूहमा विभाजन गरी छलफल चलाइने छ ।

समूहगत छलफलका निष्कर्ष शुक्रबार ११ बजे बैठकमा प्रस्तुत गर्ने तयारी छ ।

यो पनि पढ्नुहोस

‘दलका नेतालाई भ्रष्टाचार छानबिनका नाममा जेल हाल्ने चलखेल हुनसक्छ’

यसअघि पार्टी केन्द्रीय कार्यालय स्थायी कमिटीको बैठकमा अध्यक्ष प्रचण्डले सम्पूर्ण कमिटी विघटन गरी आफ्नो नेतृत्वमा विशेष महाधिवेशनमा जाने प्रस्ताव गरेका थिए ।

स्थायी कमिटी बैठकमा वरिष्ठ उपाध्यक्ष श्रेष्ठले आफूलाई कार्यवाहक दिन भनेको स्रोत बताउँछ ।

संस्थापन पक्ष भने प्रचण्डको विकल्प खोज्नतर्फ लाग्न नहुने भन्दै बचाउमा उत्रिरहेका छन् । स्थायी कमिटी बैठकमा नेता मात्रिका यादवले अनन्तकालसम्म प्रचण्डको विकल्प खोज्न नहुने बताएका थिए ।

तर, पार्टी उपाध्यक्ष एवं पार्टी प्रवक्ता अग्नि सापकोटाले असहमति र असन्तुष्टि केन्द्रीय समितिको बैठकमा राख्ने गरी स्थायी कमिटी बैठक टुंगिएको बताएका थिए । जेनजी प्रदर्शनपछि शीर्ष नेतालाई नेतृत्व छाड्न दबाव बढिरहेका बेला माओवादीमा पनि नेताहरूले पुस्तान्तरण र रूपान्तरणको आवाज उठाइरहेका छन् ।