फ्लड लाइट बालेर तुइनखोलाको पहिरो पन्छाइँदै, सडक आजै रातिदेखि खुल्ने

News Summary

Generated by OK AI. Editorially reviewed.

मुग्लिन-नारायणगढ सडक खण्डको तुइनखोला नजिकै भयंकर सुक्खा पहिरो खसेपछि सडक डिभिजन भरतपुरले फ्लड लाइट जडान गरी पहिरो पन्छाउने काम गरिरहेको छ।
सडक डिभिजन भरतपुरका सूचना अधिकारी कृष्णप्रसाद आचार्यका अनुसार एक डेढ घण्टामा सडक सञ्चालनमा आउनेछ।
फ्लड लाइट जडान गरी पहिरो पन्छाउने कामलाई निरन्तरता दिँदै रातिदेखि पूर्ण रूपमा पहिरो हटाएर आवागमन सञ्चालन गर्ने तयारी भइरहेको छ।

९ असोज, काठमाडौं । फ्लड लाइट जडान गरेर तुइनखोला नजिकै गएको सुक्खा पहिरो पन्छाउने काम भइरहेको छ ।

पूर्ण रूपमा पहिरो हटाएर आजै रातिदेखि आवागमन सञ्चालन गर्ने तयारी स्वरूप फ्लड लाइट बालेर पहिरो पन्छाउने कामलाई निरन्तरता दिइएको सडक डिभिजन भरतपुरले जनाएको छ ।

सडक डिभिजन भरतपुरका सूचना अधिकारी कृष्णप्रसाद आचार्यले भने, ‘फ्लड लाइट बालेर पहिरो पन्छाउने काम भइरहेको छ । सम्भवतः एक डेढ घण्टामा सडक सञ्चालनमा आउने छ ।’

उनका अनुसार पहिरो पन्छाउन ६ वटा उपकरण प्रयोग भइरहेको छ । मुग्लिन खण्डतर्फबाट ३ वटा र नारायणगढतर्फबाट ३ वटा उपकरणले पहिरो पन्छाउने काम भइरहेको हो ।

आज रातदेखि दुईतर्फी नै सवारी चलाउन मिल्ने गरी काम भइरहेको सडक विभागका इन्जिनियर अर्जुन घिमिरेले जानकारी दिए । उनका अनुसार पहिरो पन्छाउने काम अन्तिम चरणमा पुगेको छ ।

मुग्लिन-नारायणगढ सडक खण्डको तुइनखोला नजिकै मंगलबार अपरान्ह भयंकर सुक्खा पहिरो खसेको थियो । जसका कारण सडक अवरुद्ध छ ।

सडक पूर्ण रूपमा अवरुद्ध बनेपछि चितवन प्रशासनले वैकल्पिक राजमार्ग प्रयोग गर्न अनुरोध गरेको छ भने अलपत्र परेका यात्रुहरूलाई बसको व्यवस्था गरेर उद्धार गरिरहेको छ ।