नियमित फौजदारी अनुसन्धान गर्न गृह मन्त्रालय स्वतन्त्र छ : गौरीबहादुर कार्की

News Summary

Generated by OK AI. Editorially reviewed.

उच्चस्तरीय न्यायिक जाँचबुझ आयोगले नियमित फौजदारी प्रकियाको अनुसन्धान अघि बढाउन आयोगको कामले कुनै बाधा नपर्ने स्पष्ट पारेको छ।
आयोगका अध्यक्ष गौरीबहादुर कार्कीले गृह मन्त्रालयले आयोगको कामले हात बाँधेर बस्नु नपर्ने र नियमित काम आफैं गर्न मिल्ने बताउनुभयो।
उनले नियमित फौजदारी प्रक्रिया अघि बढाउन आयोगको निर्णय आवश्यक नहुने र गृह मन्त्रालय स्वतन्त्र हुने उल्लेख गर्नुभयो।

२० असोज, काठमाडौं । जेनजी आन्दोलनका क्रममा भएका घटना जाँचबुझका लागि गठित उच्चस्तरीय न्यायिक जाँचबुझ आयोगले नियमित फौजदारी प्रकियाका अनुसन्धान अघि बढाउन आयोगका कामले कुनै बाधा नपर्ने स्पष्ट पारेको छ ।

आयोगले काम गरिरहेका कारण भदौ २३ र २४ गतेको आन्दोलन सम्बन्धी घटनाको नियमित अनुसन्धान अहिले नहुने आसयको धारणा केही समय अघि गृह मन्त्रालयले सार्वजनिक गरेको थियो ।

प्रहरी लगागतका निकायले गर्ने नियमित अनुसन्धान नै प्रभावित हुने भन्दै गृह मन्त्रालयको उक्त निर्णयको विरोध भएको थियो ।

आयोगका अध्यक्ष गौरीबहादुर कार्कीले यो विषयमा स्पष्ट पार्दै कुनै पनि नियमित काम गर्न आयोगको मुख ताक्न नपर्ने बताए ।

‘आयोगको कामकारबाहीका कारण अन्य काम गर्न मुख ताक्नुपर्दैन,’ कार्कीले अनलाइनखबरसँग भने, ‘गृह मन्त्रालयले आयोगले काम गरिरहेको छ भनेर हात बाँधेर बस्नु पर्दैन नियमित कामकारबाही अफ्न ढंगले गर्न मिल्छ ।’

उनले नियमित फौजदारी प्रक्रिया अघि बढाउन आयोगको निर्णय आवश्यक नपर्ने बताए । ‘कोही संलग्न देखिन्छ भने नियमित फौजदारी प्रक्रिया अन्तर्गत कारबाही अघि बढाउन गृह मन्त्रालय स्वतन्त्र हुन्छ,’ उनले भने ।