काभ्रेमा बसले ट्रकलाई ठक्कर दिँदा ८ जना घाइते, ३ को अवस्था गम्भीर

२२ असोज, काभ्रेपलाञ्चोक । काभ्रेको पाँचखाल नगरपालिका-६ मा बसले ट्रकलाई ठक्कर दिँदा ८ जना घाइते भएका छन् ।

काठमाडौंबाट बाह्रबिसेतर्फ जाँदै गरेको बा२ख ६५७९ नम्बरको बसले सोही दिशा तर्फ जाँदै गरेको सडक विभागको बा ५ ख ६८३ नम्बरको आइचर ट्रकलाई पाँचखाल नगरपालिका-६ दुलालथोकमा ठक्कर दिएको थियो ।

बसले ठक्कर दिँदा ट्रक अनियन्त्रित भई सडकबाट ३० मिटर तल खसेको थियो ।

प्रहरीका अनुसार दुर्घटनामा परी ट्रकका ६ जना र बसका २ जना यात्रु छन् । घाइतेमध्ये ट्रकमा सवार ३ जनाको अवस्था गम्भीर रहेको प्रहरी चौकी पाँचखालका प्रहरी निरीक्षक प्रशान्त तामाङले जानकारी दिए ।

प्रहरी निरीक्षक तामाङका अनुसार ट्रकमा सवार काभ्रेपलाञ्चोक मण्डन देउपुर नगरपालिका-६ का रेशम थापा, बेथानचोक गाउँपालिका-४ का ४३ वर्षीय लाइतलाल तामाङ र  झापाका ५८ वर्षीय लालबहादुर राई गम्भीर घाइते भएका छन् । त्यस्तै चौतारा साँगाचोकगढी नगरपालिका-१ का ५८ वर्षीय शेरबहादुर तामाङ, फुर्वा तामाङ र भक्तपुर सूर्यविनायक का ५८ वर्षीय रामचन्द्र अधिकारी सामान्य घाइते भएका छन् ।

बसमा सवार सिन्धुपाञ्चोक बाह्रबिसे नगरपालिका-२ का ७० वर्षीय युक्तबहादुर खत्री र  बलेफी गाउँपालिका-६ का ६६ वर्षीय गोपिलाल पराजुली सामान्य घाइते भएको उनले बताए ।

घाइतेको तत्काल उद्धार गरी पाँचखाल आधारभूत अस्पतालमा सामान्य उपचार पश्चात् धुलिखेल हस्पिटल पठाइएको प्रहरी निरीक्षक तामाङले जानकारी दिए ।

बस चालक भने पाँचखाल प्रहरी चौकीको नियन्त्रणमा रहेको र दुर्घटनाबारे थप अनुसन्धान भइरहेको उनले बताए ।