वर्तमान सरकार मुठभेडतर्फ उद्यत भयो : एमाले

२४ असोज, काठमाडौं । नेकपा एमालेले वर्तमान अन्तरिम सरकार निर्वाचन गराउने बाटोमा नभइ मुलुकलाई अनावश्यक तिक्तता, तनाव र मूठभेडतिर लैजान उद्यत भएको बताएको छ ।

शुक्रबार भक्तपुरको गुण्डुमा बसेको सचिवालय बैठकले सरकारबारे गम्भीर छलफल गरेको बताउँदै उपमहासचिव प्रदीप ज्ञवालीले बताए ।

‘एकातिर प्रहरीलाई कुटीकुटी हत्या गर्ने र हतियार लुट्नेलाई सजिलै छाडिदिने, गृहमन्त्रीको दबाबमा । अर्कोतिर शान्तिपूर्ण प्रदर्शन गर्ने दलहरूलाई रोक्ने, नेताहरूलाई स्थान हद रोक्ने कुराहरूले वर्तमान सरकार निर्वाचन गराउने बाटोमा नभइ मुलुकलाई अनावश्यक तिक्तता, तनाव र मुठभेडतिर लैजान उद्धत छ,’ उनले भने ।

वर्तमान सरकारले गरेका क्रियाकलापबारे पार्टीमा गम्भीर समीक्षा भएको उनले बताए ।

‘सबैको निष्कर्ष चाहीँ भदौ २३ गते जेनजी युवाले राखेका आवाज स्वभाविक थिए । उहाँहरूले पनि आन्दोलन शान्तिपूर्ण हुन्छ, निषेधित क्षेत्र तोड्दैनौं, सामाजिक सञ्जाल सञ्चालन गर्ने मामलामा दबाब सिर्जना गर्छौं भन्नुभएको थियो । तर, निषेधित क्षेत्र तोडेर दु:खको अवस्था बन्यो,’ उनले भने ।

जेनजी आन्दोलनको गहिरो छानबिन हुनुपर्ने एमालेले बताएको छ । भदौ २४ गते जे भयो, त्यो लोकतन्त्र, संविधान र इतिहासप्रतिकै ठूलो आक्रमण भएको एमालेले जनाएको छ ।

‘यो सामान्य घटना होइन । यसको गम्भीरताका साथ छानबिन अघि बढ्नुपर्छ,’ उनले भने ।

अहिलेको सरकारले गरेका क्रियाकलाप्रति भने पार्टीको गम्भीर ध्यानाकर्षण भएको पनि उनले बताए ।

‘यो सरकारले जे क्रियाकलाप गर्दैछ । यसप्रति हाम्रो गम्भीर ध्यानाकर्षण भएको छ । मुलुकलाई विभाजित भएको मनस्थितिलाई जोडेर राष्ट्रिय एकता कायम गर्नुपर्ने थियो,’ उनले भने, ‘तर, सरकार निषेधको बाटोबाट अघि बढेको छ । हामीले यो सरकार बनायौं भन्नेहरू हिंसाको भाषा बोलिरहेका छन् ।