नेपाल संवत् प्रारम्भ

News Summary

Generated by OK AI. Editorially reviewed.

नेपाल संवत् ११४६ को प्रारम्भ राष्ट्रिय विभूति शंखधर सा:ख्वाले गरिब जनताको ऋणमोचन गरी सुरु गरेका थिए।
नेपाल संवतलाई नयाँ वर्षका रूपमा नेवार समुदायले काठमाडौं, ललितपुर, भक्तपुर लगायत क्षेत्रमा विशेषरूपमा मनाउने गर्छन्।
२०६५ सालमा प्रधानमन्त्री पुष्पकमल दाहालले नेपाल संवतलाई राष्ट्रिय मान्यता दिने घोषणा गरेका थिए।

५ कात्तिक, काठमाडौं। नेपाल संवत् ११४६ प्रारम्भ भएको छ ।

राष्ट्रिय विभूति शंखधर सा:ख्वाले विसं ९३७ (इ सं ८८०) मा गरिब जनताको ऋणमोचन गरी नेपाल संवत् सुरु गराएका थिए । नेपाल संवत् अवसरमा बुधबार काठमाडौंका विभिन्न स्थानमा र्‍यालीका साथै शुभकामना आदान प्रदान कार्यक्रमको आयोजना गरिएको थियो ।

विसं २००७ मा प्रजातन्त्रको स्थापना भएपछि नै नेपाल संवतलाई राष्ट्रिय मान्यताका लागि अभियान चलाइएको छ । नेपाल संवतलाई नयाँ वर्षका रूपमा काठमाडौं, ललितपुर, भक्तपुर, बनेपा, धुलिखेल, बाह्रबिसे, दोलखा भीमेश्वर लगायत क्षेत्रमा बसोबास गर्ने नेवार समुदायले विशेषरूपमा मनाउने गरिन्छ ।

गरिब जनताको ऋणमोचन गराई सामाजिक सेवाको उत्कृष्ट नमूना प्रस्तुत गरेको र नेपालमा मौलिक संवत् समेत चलाएको कार्यको उच्च मूल्याङ्कन गर्दै २०५६ सालको नयाँ वर्षका दिनमा तत्कालीन प्रधानमन्त्री कृष्णप्रसाद भट्टराईले सा:ख्वालाई राष्टिय विभूति घोषणा गरेका थिए ।

२०६५ सालमा प्रधानमन्त्री पुष्पकमल दाहालले नेपाल संवतले राष्ट्रिय मान्यता पाउने घोषणा गरे । कात्तिक कृष्ण औंसीका दिन बही खाता बन्द गरी नयाँ वर्ष अर्थात् कात्तिक शुक्ल प्रतिपदाका दिन नयाँ बही खाताको सुरवात गर्ने परम्परा समेत काठमाडौंमा अझै छ ।