करिश्माले माफी मागिन् : कुर्सीलाई ढोगिन्, कान समातेर उठ्बस गरिन्

News Summary

Generated by OK AI. Editorially reviewed.

अभिनेत्री करिश्मा श्रेष्ठले त्रिवि क्रिकेट मैदानमा कुर्सीमा खुट्टा टेक्ने घटनामा माफी मागेकी छिन्।
उनले इन्स्टाग्राममा रिल्स पोस्ट गर्दै 'कसैलाई अनादर गर्ने मेरो उद्देश्य थिएन' भनेकी छिन्।
करिश्मा नियमितरुपमा नेपाल प्रिमियर लिग हेर्न त्रिवि क्रिकेट मैदान पुगिरहेकी छिन्।

काठमाडौं । अभिनेत्री तथा मोडल करिश्मा श्रेष्ठले खुट्टाले कुर्सीलाई टेकेको घटनामा माफी मागेकी छिन् । त्रिवि क्रिकेट मैदानमा जारी नेपाल प्रिमियर लिग (एनपीएल) मा खेल हेर्ने क्रममा उनले खुट्टाले कुर्सीमा टेकेको फोटो सार्वजनिक गरेकी थिइन् ।

फोटो भाइरल मात्र भएन, उनले चौतर्फी गाली खानुपर्‍यो । सामाजिक सञ्जाल प्रयोगकर्ताले सेलिब्रेटी भएर संस्कार बिर्सिएको आरोप लगाए ।

विहिबार इन्स्टाग्राममा नयाँ रिल्स पोस्ट गर्दै करिश्माले माफी मागेकी छिन् । रिल्समा उनले कुर्सीलाई निहुरिएर ढोगेको, कान समातेर उठ्बस गरेकोदेखि खसेका फोहोर संकलन गरेको देखिन्छ ।

‘हो मैले व्यक्तिगतरुपमा कुर्सीसँग माफी मागेँ । तपाईंहरू सबैलाई स्पष्ट पार्न चाहन्छु- कसैलाई अनादर गर्ने मेरो उद्देश्य थिएन । यो एउटा तीव्र गतिको पोज थियो र मेरो खुट्टा केही सेकेन्डको लागि कुर्सीमा थियो । मलाई थाहा थिएन कि यो आपत्तिजनक देखिन्छ । तैपनि, यदि यसले कसैलाई असर पारेको छ भने साँच्चै माफी चाहन्छु ।’

एनपीएल सुरु भएदेखि नै करिश्मा नियमितरुपमा त्रिवि क्रिकेट मैदानमा पुगिरहेकी छिन् । करिश्माले एउटा साथी, लभ सब, बाबु कान्छा, मायावी, ११ः५५ जस्ता फिल्ममा अभिनय गरेकी छिन् । मोडल समेत रहेकी उनी पछिल्लो कन्टेन्ट क्रिएसनमा समेत ब्यस्त छिन् ।