सुशान्तले गरे ‘अस्ट्रेलिया टूर’ को घोषणा, ५ सहरमा दिनेछन् प्रस्तुति

काठमाडौं । गायक सुशान्त केसीले अस्ट्रेलिया टूर २०२६ को घोषणा गरेका छन् । यो टूर फेब्रुअरीदेखि मार्चको पहिलो सातासम्म चल्ने उनले जानकारी दिएका छन् ।

२१ फेब्रुअरीमा पर्थदेखि सुरु हुने उनको टूर ६ मार्चमा सिड्नी पुगेर टुंगिनेछ । २४ फेब्रुअरीमा ब्रिसबेन, २६ फेब्रुअरीमा एडिलेड, २ मार्चमा मेलबर्नमा हुने केसीले जनाएका छन् ।

यसअघि उनले सन् २०२२ मा ‘ड्रीम फेस्ट टूर’ अन्तर्गत अस्ट्रेलियामा प्रस्तुति दिएका थिए । २ वर्षपछि उनी अस्ट्रेलियाको नेपाली डायस्पोरामा गुञ्जिन लागेका हुन् ।

‘अन्ततः सुशान्त केसी घर फर्किदैंछन् । यो होमकमिङ भावको टूर हुनेछ’ उनले इन्स्टाग्राममा पोस्ट गरेको जानकारीमा उल्लेख छ, ‘पाँच सहर, एक आवाज, लाखौं भावना । यो टूर मात्र होइन, यो घर फिर्ती हो ।’

सुशान्तको यो कन्सर्टको लागि टीआरएन इभेन्ट्सले टिकट पनि विक्री थालेको छ । ‘मेरो अस्ट्रेलियाको यात्राले पूर्णता पाउँदैछ’ टूरको तयारीबारेको भिडियो सेयर गर्दै सुशान्तले लेखेका छन् ।

सुशान्तको लागि सन् २०२५ कोे उत्तराद्र्ध खास रह्यो । उनले ‘यस्तै रैछ’ शीर्षकको छोटो फिल्मबाट अभिनयमा डेब्यू गरे, जहाँ उनी ‘शाम्बाला’ फेम्ड अभिनेत्री थिन्ले ल्हामोसँग देखिएका थिए ।

उनले आफ्नो होमप्रोडक्सन फिल्म निर्माण कम्पनी एसकेसी स्टुडियो पनि संचालनमा ल्याएका छन् । यो स्टुडियोबाट उनी निकट भविष्यमा फिल्म निर्माणमा पनि अघि बढ्ने जनाइएको छ ।