प्युठानमा कृष्णध्वज खड्काले पाए नेकपाको टिकट

भोजविक्रम बुढा ब्याक

अनलाइनखबर

२०८२ माघ ४ गते १५:३४

News Summary

Generated by OK AI. Editorially reviewed.

नेपाली कम्युनिस्ट पार्टीले प्युठानको प्रतिनिधि सभा निर्वाचनका लागि कृष्णध्वज खड्कालाई उम्मेदवार बनाएको छ।
साविक एकीकृत समाजवादीका भोजविक्रम बुढालाई पछि हटाएर साविक माओवादी खड्कालाई टिकट दिइएको हो।
खड्काले टिकट पाएसँगै दाङ क्षेत्र नम्बर १ मा साविक एकीकृत समाजवादीका मेटमणि चौधरीको टिकट पक्का भएको छ ।

४ माघ, काठमाडौं । नेपाली कम्युनिस्ट पार्टी (नेकपा)ले प्युठानको प्रतिनिधि सभा निर्वाचनको उम्मेदवार कृष्णध्वज खड्कालाई बनाएको छ ।

यसअघि साविक एकीकृत समाजवादीका भोजविक्रम बुढालाई उम्मेदवार बनाउने निर्णय भए पनि उनलाई पछि हटाएर साविक माओवादीका खड्कालाई टिकट दिइएको हो ।

लुम्बिनी प्रदेश सभा सदस्य खड्काले नेपाली कम्युनिस्ट पार्टीबाट प्युठानका लागि प्रतिनिधि सभा निर्वाचनको टिकट पाएको बताए । उनले भने, ‘टिकट मैले पाएँ, मनोनयन दर्ताका लागि प्युठान जाने तयारीमा छु ।’

२१ फागुनमा हुन लागेको प्रतिनिधि सभा निर्वाचनको मनोनयन दर्ता यही माघ ६ गते हुँदैछ ।

साविक माओवादीका खड्काले प्युठानमा टिकट पाएसँगै दाङ क्षेत्र नम्बर १ मा साविक एकीकृत समाजवादीका मेटमणि चौधरीको टिकट पक्का भएको स्रोत बताउँछ ।

यसअघि प्युठान र दाङ १ दुवै निर्वाचन क्षेत्रमा कमजोर जनाधार भएको एकीकृत समाजवादीका नेतालाई टिकट दिइएको भन्दै पार्टीका नेताहरुले नै विरोध जनाएका थिए ।

दाङ–१ मा नेकपाबाटै साविक माओवादीका कुलप्रसाद केसी सोनामले समेत उम्मेदवारी दिने घोषणा गरेका छन् । रोल्पा घर भएका लुम्बिनीका पूर्वमुख्यमन्त्री केसीले दाङ–१ मा आफूलाई टिकट नपाए स्वतन्त्र उम्मेदवारी दिने बताएका छन् ।