दूषित पानी बेच्ने नन्दीकेश्वर पानी उद्योगको १० जार नष्ट, १५ दिने अल्टिमेटम

News Summary

Generated by OK AI. Editorially reviewed.

खाद्य प्रविधि तथा गुण नियन्त्रण विभागले भक्तपुर सूर्यविनायकको नन्दीकेश्वर बोतल ब्लोइङ प्रालिमा दूषित पानी बिक्री वितरण गरेको उजुरीपछि अनुगमन गरी कारबाही प्रक्रिया अघि बढाएको छ।
अनुगमनमा उद्योगमा गम्भीर लापरबाही, न्यूनतम मापदण्ड नपालना, सरसफाइ अभाव, र प्रशोधन कक्षमा चुहावट र अव्यवस्था फेला परेको विभाग प्रवक्ता डा. बालकुमारी शर्माले बताउनुभयो।
विभागले पुराना र कुच्चिएका १० वटा जार नष्ट गरी पानीको नमुना परीक्षणका लागि पठाएको र १५ दिनभित्र सुधार प्रमाणसहित उपस्थित हुन निर्देशन दिएको छ।

७ माघ, काठमाडौं । खाद्य प्रविधि तथा गुण नियन्त्रण विभागले भक्तपुर सूर्यविनायकमा सञ्चालित एक पानी उद्योगमा अनुगमन गरी कारबाही प्रक्रिया अघि बढाएको छ ।

सूर्यविनायक नगरपालिका-९ मा रहेको नन्दीकेश्वर बोतल ब्लोइङ प्रालिले दूषित पानी बिक्री वितरण गरिरहेको भन्ने उजुरीका आधारमा विभागले आकष्मिक निरीक्षण गरेको हो ।

विभाग प्रवक्ता डा. बालकुमारी शर्माका अनुसार २९ पुसमा प्राप्त उजुरीको तत्काल सम्बोधन गर्दै ३० पुसमा विभागको टोलीले उक्त उद्योगको स्थलगत अनुगमन गरेको थियो ।

अनुगमन क्रममा उक्त उद्योगमा गम्भीर लापरबाही र न्यूनतम मापदण्ड समेत पालना नभएको पाइएको छ । निरीक्षण टोलीले उद्योगको समग्र सरसफाइ र कामदारको व्यक्तिगत स्वच्छताको अवस्था सन्तोषजनक नरहेको फेला पारेको छ ।

त्यसैगरी पानी प्रशोधन गर्ने कक्षमा रहेका ट्यांकी र पाइपहरूमा चुहावट (लिकेज) भएको, भुइँका टायलहरू फुटेको र प्रशोधन कक्षमा अनावश्यक सरसामान राखेर भद्रगोल बनाइएको अवस्थामा भेटिएको विभागले जनाएको छ ।

खाद्य स्वच्छता तथा गुणस्तर ऐन २०८१ बमोजिम गरिएको उक्त कारबाहीमा विभागले उद्योगमा फेला परेका पुराना, कुच्चिएका र कोत्रिएका १० वटा जार तत्कालै नष्ट गरेको छ ।

विभागले उक्त उद्योगबाट प्रशोधित पिउने पानीको नमुना संकलन गरी प्रयोगशाला परीक्षणका लागि पठाउनुका साथै प्रशोधित पिउने पानी उत्पादन मापदण्ड सम्बन्धी निर्देशिका २०७४ अनुसार मात्र कार्य गर्न सचेत गराएको छ ।

प्रवक्ता शर्माले उद्योगमा देखिएका यी कैफियत तत्काल सुधार गर्न र १५ दिनभित्र सुधार भएको प्रमाणसहित विभागमा उपस्थित हुन निर्देशन दिइएको जानकारी दिइन् ।