जुलुस र आमसभा गर्नुअघि अनिवार्य अनुमति लिन जिप्रकाको आग्रह

६ फागुन, रोल्पा । आसन्न प्रतिनिधिसभा निर्वाचनलक्षित जुलुस, आमसभा वा भेला गर्नुअघि अनिवार्य रूपमा अनुमति लिन रोल्पा प्रशासनले आग्रह गरेको छ ।

निर्वाचन आयोगद्वारा जारी निर्वाचन आचारसंहिताअनुसार चुनावी प्रचारप्रसार कार्यक्रम गर्नुअघि अनिवार्य अनुमति लिन जिल्ला प्रशासन कार्यालय रोल्पाले आग्रह गरेको हो ।

आयोगले निर्वाचनका लागि फागुन ४ गते देखि जुलुस, आमसभा, कोणसभा तथा घरदैलो कार्यक्रम सञ्चालन गर्न पाइने जनाइएको छ । यद्यपि, दल तथा उम्मेदवारले त्यसअघि नै प्रचारप्रसार थालिसकेका छन् ।

जिल्ला प्रशासन कार्यालयले राजनीतिक दल, उम्मेदवार र दलका संगठनहरूलाई आचारसंहिताको पूर्ण पालना गर्न अनुरोध गरेको छ । विशेषगरी सार्वजनिक स्थलमा कुनै पनि प्रकारको जुलुस वा सभा आयोजना गर्नुभन्दा कम्तीमा २४ घण्टाअगावै मिति, समय, मार्ग र स्थान खुलाएर जानकारी गराइ अनुमति लिन आग्रह गरिएको प्रमुख जिल्ला अधिकारी गंगाबहादुर क्षेत्रीले जानकारी दिए ।

‘हामीले सबै उम्मेदवारलाई मनोनयन दर्ता गर्दा नै अनुमति लिने भनिसकेका छौं’, उनले भने ।

अनुमतिका लागि दल वा उम्मेदवारका अख्तियारप्राप्त प्रतिनिधिले जिल्ला प्रशासन कार्यालय रोल्पामा निवेदन दिन सक्ने जनाइएको छ । साथै कार्यालयको इमेल ठेगानामार्फत पनि निवेदन दर्ता गर्न सकिने रोल्पा प्रशासनले जनाएको छ ।