इरानी आक्रमणमा ज्यान गुमाएका गोरखाका श्रेष्ठको शव परिवारलाई हस्तान्तरण

News Summary

Generated by OK AI. Editorially reviewed.

इरानको मिसाइल आक्रमणमा यूएईमा ज्यान गुमाएका दिवस श्रेष्ठको शव परिवारलाई आवश्यक कानुनी प्रक्रिया पूरा गरी हस्तान्तरण गरिएको छ।
परराष्ट्र मन्त्रालयले मृतक श्रेष्ठको परिवारलाई आवश्यक क्षतिपूर्ति दिने प्रक्रिया सुरु भइसकेको जानकारी गराएको छ।
मध्यपूर्वमा रहेका नेपाली नागरिक सुरक्षित रहेको र उनीहरूको सुरक्षाका लागि सरकार गम्भीर रहेको परराष्ट्र मन्त्रालयले बताएको छ।

२७ फागुन, काठमाडौं । इरानको मिसाइल आक्रमणमा यूएईमा ज्यान गुमाएका दिवस श्रेष्ठको शव परिवारलाई हस्तान्तरण गरिएको छ ।

बुधबार परराष्ट्र मन्त्रालयले पत्रकार सम्मेलन गर्दै आवश्यक कानुनी प्रक्रिया पूरा गरी मृतक श्रेष्ठको शव परिवारलाई हस्तान्तरण गरिएको जानकारी गराएको हो ।

कार्यक्रममा बोल्दै मध्य एशिया, पश्चिम एशिया तथा अफ्रिका महाशाखा प्रमुख रामकाजी खड्काले श्रेष्ठको परिवारलाई आवश्यक क्षतिपूर्ति दिने प्रक्रिया समेत सुरु भइसकेको जानकारी दिए ।

उनले मध्यपूर्वमा बढ्दो तनावबारे परराष्ट्र मन्त्रालय, विदेशस्थित नेपाली नियोग तथा राजदुतावासहरूमार्फत जानकारी एवं ट्राभल एड्भाइजरी जारी गर्ने कार्य भइरहेको जानकारी दिए ।

‘इरानको आक्रमणमा परी यूएईमा ज्यान गुमाएका गोरखाका दिवस श्रेष्ठको पार्थिव शरीर नेपाल ल्याएर आवश्यक कानूनी प्रक्रिया पूरा गरी परिवारलाई हस्तान्तरण गरिएको छ । परिवारलाई आवश्यक क्षतिपुर्ती दिने प्रक्रिया समेत सुरु भएको छ,’ महाशाखा प्रमुख खड्काले भने ।

मृतक श्रेष्ठ गोरखाको भीमसेन थापा गाउँपालिका– ७ बोर्लाङ थान्तीका हुन् । उनी यूएईमा सुरक्षा गार्डको रूपमा कार्यरत थिए ।

खड्काले मध्यपूर्वमा रहेका नेपाली नागरिकहरू सुरक्षित रहेको जानकारी गराउँदै उनीहरूको सुरक्षाका लागि सरकार गम्भी रहेको समेत बताए ।