सुनिल थापालाई ट्रिब्युट दिँदै ‘राम नाम सत्य’ को ट्रेलर सार्वजनिक

काठमाडौं । दिवंगत अभिनेता सुनिल थापालाई ‘ट्रिब्युट’ दिँदै फिल्म ‘राम नाम सत्य’ को टिजर युट्युबमा सार्वजनिक भएको छ । एक्सन, सस्पेन्स, प्रेम र थ्रीलर तत्व समेटिएको यो फिल्मले दर्शकलाई उत्सुक तुल्याउन सक्छ ।

यस फिल्मको क्लाइमेक्स दृश्य छायांकन गर्दागर्दै अभिनेता थापाको हालै निधन भएको थियो । जसले गर्दा, यो फिल्म वरिष्ठ अभिनेता थापाप्रति पूर्णतः समर्पित देख्न सकिन्छ ।

सार्वजनिक टिजरमा अभिनेता विराज भट्टको यसअघि नदेखिएको एक्सन अवतार देख्न सकिन्छ । माइकल चन्दको निर्देशनमा तयार भएको यो फिल्मको टिजरमा भट्टलाई पुरै एक्सनमा देख्न सकिन्छ ।

फिल्ममा सुशील श्रेष्ठ, दिव्या रायमाझी, सुपुष्पा भट्ट, आयुषसिंह ठकुरी, सुनिल थापा, प्रशान्त ताम्राकार, खुशी कार्की लगायतका कलाकारको अभिनय छ ।

माइकल इन्टरटेन्मेन्टको व्यानरमा निर्माण भएको यो फिल्ममा उपेन्द्र शाही र स्वेता बिमलीको लगानी छ । किशोर भट्ट, राजेन्द्र भट्ट र अर्जुन सुनार कार्यकारी निर्माता रहेको फिल्मका क्रियटिभ निर्माता मोती कार्की हुन् ।

राजेन्द्र आचार्य लाइन प्रोड्युसर रहेको फिल्ममा बाबुल गिरी, अर्जुन पोखरेल, एसडी योगी, नवाज अन्सारीको संगीत छ । अभिमन्यू निरवी र समय थपलिया फिल्मका स्क्रिप्ट सल्लाहाकार हुन् ।

माइकल चन्दकै कथा र पटकथा रहेको फिल्ममा मानकृष्ण महर्जनको छायांकन, श्री श्रेष्ठको एक्सन कोरियोग्राफी, बन्दे प्रसादको सम्पादन, काला चरणको पाश्र्वध्वनि छ । साहिल खानले टिजर र ट्रेलर तयार पारेका हुन् ।

यो फिल्ममा समावेश ‘धागोले बाटेको’ बोलको गीत सुपरहिट भइसकेको छ । ‘राम नाम सत्य’ २७ चैतदेखि प्रदर्शन तयारीमा छ ।