पूर्वयुवराज पारस शाह अस्पताल भर्ना, पेसमेकर फेरियो

फाइल तस्वीर

News Summary

Generated by OK AI. Editorially reviewed.

पूर्वयुवराज पारस शाहलाई बिहीबार बिहान काठमाडौंको नर्भिक अन्तर्राष्ट्रिय अस्पतालमा उपचारका लागि भर्ना गरिएको छ।
उहाँको मुटुमा समस्या भएर पेसमेकरको ब्याट्री सकिएकाले नयाँ पेसमेकर परिवर्तन गरिएको चिकित्सकले बताए।
शाहको स्वास्थ्य अवस्था स्थिर छ र दुई तीन दिनमा डिस्चार्ज गर्न सकिने चिकित्सकले खुलाएका छन्।

१९ चैत, काठमाडौं । पूर्वयुवराज पारस शाहलाई उपचारका लागि अस्पताल भर्ना गरिएको छ। बिहीबार बिहान उनलाई काठमाडौंको थापाथलीस्थित नर्भिक अन्तर्राष्ट्रिय अस्पतालमा भर्ना गरिएको हो।

उपचारमा संलग्न चिकित्सका अनुसार बिहीबार बिहान पेसमेकर फेरिएको हो ।

‘मुटुमा समस्या भएको कारणले बैंककमा पेसमेकर हालिएको थियो,’ ती चिकित्सकले भने, ‘ उक्त उपकरणको ब्याट्री सकिएकाले त्यसलाई परिवर्तन गरिएको हो ।’

चिकित्सकका अनुसार शाहको मुटु कमजोर भएपछि पेसमेकर शरीरमा राखिएको हो । ‘अहिले उहाँको स्वास्थ्य अवस्था स्थिर छ । दुई तीन दिनमा डिस्चार्ज गर्न सकिन्छ,’ ती चिकित्सकले भने ।

पेसमेकर मुटुलाई कृतिम चाल दिने यन्त्र हो । व्यक्तिलाई आवश्यक पर्ने मुटुको चाल मुटुले उत्पादन गर्न नसक्दा शरीरमा पेसमेकर राखिने गर्छ ।

मुटुले चाल उत्पन्न गर्न नसक्दा रिगाँटा लाग्ने देखि होस् नै हराउने सम्मको अवस्था सिर्जना गर्छ । त्यस्तो व्यक्तिका लागि मुटुको चाल निकाल्नका लागि पेस मेकर उपकरण शरीरमा राखिन्छ ।