सूचीकृत ५ सिमेन्ट उद्योग, कुनको अवस्था कस्तो ?

३ जेठ, काठमाडौं । चालु आर्थिक वर्षको तेस्रो त्रैमाससम्म आउँदा सिमेन्ट कम्पनीहरूको वित्तीय विवरण थप सुधारिएको छ । नेपाल स्टक एक्स्चेन्जमा हाल पाँच सिमेन्ट कम्पनी सूचीकृत छन् ।

सर्वोत्तम, शिवम्, पाल्पा, घोराही र सोनापुर बजारमा सूचीकृत सिमेन्ट कम्पनी हुन् । सूचीकृत यी सबै कम्पनीले चालु आर्थिक वर्षको तेस्रो त्रैमासिक वित्तीय विवरण सार्वजनिक गरेका छन् । सार्वजनिक वित्तीय विवरणअनुसार औसतमा यी कम्पनीले नाफा बढाएका छन् भने एउटाले नोक्सानी घटाएको छ ।

बिक्री आम्दानी बढ्दा तथा वित्तीय लागत घट्दा कम्पनीहरूले नाफा बढाउन वा नोक्सानी घटाउन सफल भएका हुन् । सार्वजनिक वित्तीय विवरणअनुसार अधिकांशको बिक्री आम्दानी बढेको छ ।

शिवम् सिमेन्टको बिक्री आम्दानी केही घटे पनि लागत र कुल खर्चलाई व्यवस्थापन गर्दा नाफा ५४ प्रतिशत बढेको छ । पहिले नोक्सानीमा रहेको सोनापुर मिनरल्स यस पटक नाफामा गएको छ भने घोराही सिमेन्ट आफ्नो नोक्सानीलाई उच्च मात्रामा घटाउन सफल भएको छ ।

निर्माण क्षेत्र केही सल्बलाउन थालेसँगै समग्रमा बिक्री आम्दानी बढ्दा सिमेन्ट उद्योगहरूको नाफामा सुधार देखिएको हो ।

त्यस्तै वित्तीय लागत घट्दा पनि धेरै हदसम्म नाफालाई टेवा पुगेको देखिन्छ । बैंकको ब्याजदर घट्दै जाँदा उद्योगीहरूले तिर्नुपर्ने ब्याज रकम पनि घट्दो छ । यही कारण कम्पनीको वित्तीय लागत घट्न गएको छ, जसले नाफामा सिधा प्रभाव देखिएको हो ।

पहिलेभन्दा बिक्री बढेको वित्तीय विवरणले नै पुष्टि गर्छ, तर पनि उद्योग अझै पूर्ण क्षमतामा चल्न सकेका छैनन् । मुलुकभर करिब ६० सिमेन्ट उद्योग सञ्चालनमा छन् । अधिकांश उद्योग ५० प्रतिशतभन्दा कम क्षमतामा सञ्चालन भइरहेका छन् ।

सिमेन्ट कम्पनीहरूको बिक्री आम्दानी

सिमेन्ट कम्पनीहरूको नाफा स्थिति

सिमेन्ट कम्पनीको हालको वार्षिक प्रतिसेयर आम्दानी र प्रतिसेयर नेटवर्थ (रुपैयाँमा)