प्रधानमन्त्रीलाई कांग्रेस सांसद काउचाले भनिन्- कालो चश्मा खोल्नुस्, तपाईं एक्लो हुनुहुन्न

२५ साउन, काठमाडौं । नेपाली कांग्रेसकी सांसद रेनुका काउचाले प्रधानमन्त्री बालेन शाहलाई विधि, लोकतान्त्रिक मूल्यमान्यता, संविधान र संसदीय मर्यादालाई कमजोर पार्ने कार्य नगर्न आग्रह गरेकी छन् ।

प्रतिनिधिसभाको सोमबारको बैठकमा बोल्दै उनले यस्तो आग्रह गरेकी हुन् । उनले मुलुकको हितमा सरकारले चाल्ने हरेक कदममा प्रतिपक्षको साथ रहने तर लोकतान्त्रिक व्यवस्था र संसदको सर्वोच्चतालाई कमजोर बनाउने काममा प्रतिपक्ष मौन बस्न नसक्ने बताइन् ।

सांसद काउचाले प्रधानमन्त्री सत्तापक्षको मात्रै नभई सबै नेपालीको प्रधानमन्त्री भएको उल्लेख गर्दै संसद्‍मा दैनिक उठिरहेको सीमासम्बन्धी विवादास्पद अभिव्यक्तिको विषयले प्रधानमन्त्रीको राजनीतिक शाखमा असर पारेकोतर्फ समेत ध्यानाकर्षण गराइन् ।

उनले प्रधानमन्त्री साहको फेसबुक स्टाटसलाई लक्षित गर्दै प्रधानमन्त्री एक्लै नरहेको भन्दै कालो चश्मा खोल्न समेत आग्रह गरिने ।

उनले संसद्को अभिलेखमा रहेको सीमासम्बन्धी विवादास्पद अभिव्यक्ति सच्याउन किन कठिनाइ भइरहेको ? भन्दै प्रधानमन्त्रीलाई प्रश्न समेत गरिन् ।

उनले भनिन्, ‘म यो सदनबाट प्रधानमन्त्रीज्यूलाई स्पष्टसँग भन्न चाहन्छु, कालो चश्मा खोल्नुस् तपाईं एक्लो हुनुहुन्न । मुलुकको हितमा तपाईंले चाल्ने हरेक कदममा प्रतिपक्ष तपाईंको साथमा छ । तर विधि, प्रक्रिया, लोकतान्त्रिक मूल्यमान्यता, संविधान, संसदीय मर्यादा र अभ्यास तथा संसद्को सर्वोच्चतालाई कमजोर बनाउने काममा भने प्रतिपक्ष मौन बस्न सक्दैन ।’

उनले भनिन्, ‘प्रधानमन्त्रीज्यू तपाईं मान्नुस् या नमान्नुस् तपाईं सत्तापक्षको मात्रै प्रधानमन्त्री होइन । तपाईं हामी सबै नेपालीको प्रधानमन्त्री हो । त्यसैले प्रश्न गर्न चाहन्छु, दैनिक सदनमा उठिरहेको सीमासम्बन्धी विवादस्पद अभिव्यक्तिको प्रश्नले तपाईंको राजनीतिक साखमा असर परेको अझै मह;’स गर्नुभएको छैन ? संसदको रेकर्डमा रहको अभिव्यक्तिलाई सच्याउन पनि कि यति कठिनाइ भइरहेको छ ?’

प्रतिपक्षले प्रधानमन्त्रीको अपमान नगर्ने भन्दै उनले थपिन्, ‘हामी तपाईंको ओझ घटाउन होइन अझै बढाउन खोजिरहेका छौँ । प्रधानमन्त्रीज्यूको पछिल्लो कार्यशैलीले मुलुकको सन्दर्भमा अन्तर्राष्ट्रि प्रतिष्ठामाथि प्रश्न उठ्नु दुःखद् हो ।’

सांसद काउचाले प्रतिपक्षले सरकारको घेराबन्दी गर्न नभई जवाफदेही बनाउन खोजिरहेकोबारे पनि स्पष्ट पारिन् ।