रेखा थापा निर्देशित ‘माया भनेकै यस्तो होला’ को मर्मस्पर्शी टिजर सार्वजनिक

News Summary

Generated by OK AI. Editorially reviewed.

रेखा थापा निर्देशित फिल्म ‘माया भनेकै यस्तो होला’ को प्रेमिल टिजर सार्वजनिक गरिएको छ ।
यो फिल्म तीजको अवसर पारेर २६ भदौदेखि देशभरका सिनेमा हलमा प्रदर्शनमा आउँदैछ ।
नीति शाह, सृष्टि श्रेष्ठ र नम्रता श्रेष्ठको मुख्य अभिनय रहेको फिल्मको टिजरमा सकारात्मक प्रतिक्रिया मिलेको छ ।

काठमाडौं । रेखा थापा निर्देशित आगामी फिल्म ‘माया भनेकै यस्तो होला’ को मर्मस्पर्शी र प्रेमिल टिजर युट्युबमा सार्वजनिक भएको छ । टिजरले कथावस्तु र चरित्र चित्रणबारे संक्षिप्त प्रकाश पार्छ ।

एक पुरुष पात्रको तीनजना महिला पात्रसँगको प्रेम, उनीहरूसँग विवाह, सम्बन्धको जटिलता, अपेक्षा र द्वन्द्वको कथालाई निर्देशक थापाले दृश्यभाषामा प्रस्तुत गरेकी छन् ।

माया र विवाहको बुझाइ, अर्थ र महत्वलाई पात्रको दृष्टिकोणबाट दर्शाइएको छ । तपाईंलाई रोमान्टिक, फेमिली ड्रामाहरूमा रुचि छ भने यो फिल्म दर्शनीय हुनसक्छ ।

यो फिल्म हिन्दू महिलाको पर्व तीजको छेकोमा २६ भदौदेखि देशब्यापी प्रदर्शनमा आउँदैछ । टिजर हेर्दा, फिल्मले तीजको भाइब्स र संवेदनालाई आत्मसात गर्ने पक्का छ ।

प्रदर्शनको लागि ठीक १ महिना बाँकी हुँदा टिजर सार्वजनिक गरिएको छ । युट्युबमा पनि टिजरले सकारात्मक प्रतिक्रिया प्राप्त गरेको छ । कतिपयले कमेन्टमा राम्रो लभस्टोरी हुनसक्ने र हेर्ने सूचीमा राखेको बताएका छन् ।

यो फिल्ममा नीति शाह, सृष्टि श्रेष्ठ, नम्रता श्रेष्ठ र दिल श्रेष्ठको शीर्ष अभिनय छ । तीनैजना अभिनेत्री मिस नेपाल ब्युटी पेजेन्टका टाइटल विजेता हुन् । सृष्टि र नम्रताले वर्ल्ड र नीतिले इन्टरनेसनल विधामा मिस नेपालको ताज जितेका थिए ।

निर्देशक थापा पनि सन् १९९९ मा मिस नेपालको फाइनलिस्ट हुन् ।

यो फिल्मको निर्माण हरिनारायण श्रेष्ठ, मायादेवी श्रेष्ठ र प्रकाश श्रेष्ठले गरेका हुन् । नवराज श्रेष्ठ कार्यकारी निर्माता हुन् । दिया एन्ड अमु फिल्म्सको प्रस्तुतिमा फिल्म निर्माण भएको हो ।