प्यालेस्टाइन नरसंहारबारेको फिल्म ‘नाजा’ को भेनिस कीर्तिमान : २४.५ मिनेटसम्म ‘स्ट्यान्डिङ ओभेसन’

भेनिस । इजरायली फिल्मकर्मी युवाल अब्राहम र रेचल जोर निर्देशित नयाँ डकुमेन्ट्री ‘नाजा’ले भेनिस फिल्म फेस्टिभलमा कीर्तिमान बनाएको छ । बिहीबार आयोजित प्रिमियरमा फिल्मले साढे २४ मिनेट लामो ‘स्ट्यान्डिङ ओभेसन’ पाएको हो ।

यो भेनिस फिल्म फेस्टिभलको इतिहासमै सबैभन्दा लामो ‘स्ट्यान्डिङ ओभेसन’ भएको बताइएको छ । यसले गत वर्ष ‘द भ्वाइस अफ हिन्द रजब’ले पाएको २२ मिनेटको कीर्तिमान तोडेको छ ।

प्रमुख फिल्म फेस्टिभलमध्ये पनि यो अहिलेसम्मकै लामो ‘स्ट्यान्डिङ ओभेसन’ भएको बताइएको छ । शनिबार भेनिस फिल्म फेस्टिभल समापन हुँदै गर्दा यस वर्षको संस्करणमा समेत यो सबैभन्दा लामो ओभेसन हुने निश्चित देखिएको छ ।

फिल्मका कार्यकारी निर्माता तथा अस्कर विजेता ‘द जोन अफ इन्ट्रेस्ट’का निर्देशक जोनाथन ग्लेजरले अब्राहम र जोरलाई अँगालो हालेर हौसला दिएका थिए । लामो समयसम्म ताली बजिरहँदा निर्देशकद्वय गम्भीर देखिएका थिए भने केही क्षण उनीहरूका आँखा रसाएका थिए । दर्शकसमेत भावुक देखिएका थिए र केहीले प्यालेस्टिनी झन्डा बोकेका थिए ।

फिल्मको आधिकारिक कथा सारांशअनुसार ‘नाजा’ले ‘गाजामा प्यालेस्टिनी नागरिकहरूको योजनाबद्ध सामूहिक हत्यापछाडि रहेका इजरायलका प्रणालीलाई विस्तृत रूपमा’ देखाउँछ ।

तेल अभिभका भवनका छतमा रातिको समयमा गोप्य रूपमा छायांकन गरिएको यो डकुमेन्ट्रीमा इजरायली सैन्य गुप्तचर निकायका २४ अधिकारी तथा सैनिकसँग गरिएका अन्तर्वार्ता समावेश छन् ।

डकुमेन्ट्रीमा पटकपटक प्रयोग हुने ‘नाजा’ इजरायली गुप्तचर निकायले हवाई आक्रमणमा मारिन सक्ने अनुमान गरिएका सर्वसाधारणको संख्या जनाउन प्रयोग गर्ने ‘कोल्याट्रल ड्यामेज’सम्बन्धी संक्षिप्त शब्द हो ।

जुलाईमा भेनिसको प्रारम्भिक लाइनअप घोषणा भएको एक महिनापछि ‘नाजा’लाई प्रतियोगितामा थपिएको थियो । निर्देशकद्वयले बिहीबार बिहान आयोजित पत्रकार सम्मेलनमा फिल्मको काम पूरा गर्दै गरेकाले अन्तिम समयमा प्रतियोगितामा समावेश भएको बताएका थिए । उनीहरूले फिल्म निर्माणमा तीन वर्ष काम गरेका थिए ।

अब्राहम र जोर सन् २०२५ मा उत्कृष्ट डकुमेन्ट्रीतर्फ अस्कर जितेको ‘नो अदर ल्यान्ड’का चार निर्देशकमध्ये दुई हुन् । उक्त फिल्मले दक्षिणी वेस्ट बैंकमा प्यालेस्टिनीलाई आफ्ना घरबाट विस्थापित गर्न इजरायली सरकारले गरेको प्रयासलाई चित्रण गर्छ ।

डकुमेन्ट्रीको प्रिमियरअघि ‘भेराइटी’सँगको अन्तर्वार्तामा अब्राहमले इजरायली नागरिकका रूपमा आफूसँग भएको पहुँच प्रयोग गरेर उक्त प्रणाली कसरी सञ्चालन भयो भन्ने देखाउन चाहेको बताएका थिए ।

‘इजरायलीका रूपमा हामीले आफूसँग भएको स्थान र पहुँच प्रयोग गर्न चाह्यौं । हाम्रो आफ्नै समाजका सेनामा गएका मानिससम्म हामीसँग पहुँच छ,’ उनले भनेका थिए, ‘सबै मानवअधिकार संस्थाले नरसंहार भनिरहेको कार्य गर्दा त्यो प्रणालीले कसरी काम गर्‍यो भन्ने हेर्न हामीले यो पहुँच प्रयोग गर्न चाह्यौं ।’

बेन हानिया यस वर्ष म्यागी जिलेनहालको नेतृत्वमा रहेको भेनिस फिल्म फेस्टिभलको निर्णायक मण्डलकी सदस्य हुन् । निर्णायक मण्डलले शनिबार पुरस्कार विजेता चयन गर्नेछ ।