२०८३ असोज १३ गते १७:२८ 
१३ असोज, काठमाडौं । जापानमा जारी २०औं एसियन गेम्सअन्तर्गत पुरुष ५ हजार मिटर दौडमा नेपालका मुकेश पालले राष्ट्रिय कीर्तिमान बनाउँदै नवौं स्थान हासिल गरेका छन् ।
नागोया सिटी मिजुहो पार्क एथलेटिक्स स्टेडियममा भएको फाइनलमा मुकेशले १४ मिनेट ०३.६१ सेकेन्डमा निर्धारित दूरी पूरा गरे । उनी विजेता बहराइनका बिरहानु बालिउभन्दा ३२.८२ सेकेन्डले पछि रहे ।
मुकेशले ५ हजार मिटरमा राष्ट्रिय कीर्तिमान बनाउनबाट करिब ३ सेकेन्डले चुके । यसअघि पुरुष ५ हजार मिटरमा राष्ट्रिय कीर्तिमान राजेन्द्र भण्डारीको नाममा थियो ।
उनले सन् २००६ मा दक्षिण एसियाली खेलकुदमा १४ मिनेट ०१.१९ सेकेण्डको कीर्तिमान बनाएका थिए ।
मुकेशले एसियन गेम्समा जानुअघि राष्ट्रिय कीर्तिमान बनाउने लक्ष्य भएको बताएका थिए । ‘यसपालि मैले रेकर्ड ब्रेक गर्छु भन्ने अठोट छ । ५००० मिटरमा पनि नेसनल रेकर्ड ब्रेक गर्ने लक्ष्य छ’ मुकेशले अनलाइनखबरसँग भनेका थिए ।
बहराइनका बिरहानु बालिउ १३ मिनेट ३०.७९ सेकेन्डमा स्वर्ण जित्दा जापानका तोमोनोरी यामागुचीले १३ मिनेट ३१.४३ सेकेन्डमा रजत तथा भारतका गुलवीर सिंहले १३ मिनेट ३२.७५ सेकेन्डमा कांस्य पदक जिते ।
योसँगै एथ्लेटिक्समा नेपालका खेलाडीहरूको चुनौती समाप्त भएको छ ।
*यसअघि मुकेश पालले कीर्तिमान बनाएको भनेर प्रकाशित समाचारप्रति क्षमाप्रार्थी छौं
प्रतिक्रिया 4