बेलायतले चिनियाँ नागरिकलाई घण्टौं हिरासतमा राखेर कडा सोधपुछ गरेपछि चीन रुष्ट

३ कात्तिक, काठमाडौं । बेलायती सीमा सुरक्षा अधिकारीहरूले चिनियाँ नागरिकलाई घण्टौँसम्म हिरासतमा राखेर सोधपुछ गर्ने र मोबाइल फोनलगायत विद्युतीय उपकरण जफत गर्न थालेपछि चीनले बेलायत सरकारसमक्ष औपचारिक विरोध जनाएको छ।

बेलायतस्थित चिनियाँ दूतावासले विज्ञप्ति जारी गर्दै व्यापारिक प्रतिनिधिमण्डलका सदस्य, पर्यटक तथा आफन्त भेट्न बेलायत पुगेका चिनियाँ नागरिकलाई अनावश्यक ढिलाइ गराउने, लामो समय सोधपुछ गर्ने र उनीहरूका मोबाइल तथा अन्य विद्युतीय उपकरण जफत गर्ने गरिएको जनाएको छ।

आतंकवादविरोधी कानुन प्रयोग गरेको बेलायतको दाबी

चिनियाँ दूतावासका अनुसार बेलायती सीमा अधिकारीहरूले आफ्नो कदमलाई ‘काउन्टर टेररिजम एन्ड बोर्डर सेक्युरिटी एक्ट २०१९’ को प्रावधानअनुसार भएको बताएका छन्।

तर, दूतावासले यस्तो व्यवहारप्रति गम्भीर आपत्ति जनाएको छ।

‘चीन यस घटनाप्रति गम्भीर चिन्ता व्यक्त गर्दछ र बेलायती पक्षसमक्ष कडा विरोध दर्ता गराएको छ। चिनियाँ नागरिकमाथि गरिने यस्ता स्वेच्छाचारी नियन्त्रण र सोधपुछ बन्द गर्न हामी बेलायतलाई निरन्तर दबाब दिइरहनेछौँ,’ दूतावासको विज्ञप्तिमा भनिएको छ।

दूतावासले बेलायत भ्रमण गर्ने चिनियाँ नागरिकलाई आफ्नो व्यक्तिगत सम्पत्ति र गोपनीयताको रक्षा गर्न, बेलायती कानुनबारे सचेत रहन तथा आवश्यक परे कूटनीतिक सहयोग लिन आग्रह गरेको छ।

यसअघि गत डिसेम्बरमा पनि दूतावासले यस्तै सतर्कता जारी गरेको थियो। त्यतिबेला बेलायती अधिकारीहरूले आतंकवादविरोधी कानुनको प्रयोग गरेर मोबाइल, कम्प्युटर र स्मार्टवाचजस्ता उपकरण जफत गर्न सक्ने भन्दै चिनियाँ नागरिकलाई सचेत गराइएको थियो।

एमआई–फाइभको आरोपपछि विवाद चर्कियो

बेलायती गुप्तचर संस्था एमआई–फाइभका महानिर्देशक केन म्याकलमले वार्षिक सुरक्षा प्रतिवेदनमा चीनमाथि जासुसी र हस्तक्षेपको आरोप लगाएको एक सातापछि यो विवाद सार्वजनिक भएको हो।

म्याकलमले चिनियाँ गुप्तचर संस्थाहरूले बेलायतका विश्वविद्यालय र अनुसन्धान संस्थामा कृत्रिम बौद्धिकता (एआई) तथा साइबर सुरक्षाजस्ता संवेदनशील प्रविधि चोर्न नक्कली अनुसन्धान संस्थाहरू प्रयोग गरिरहेको आरोप लगाएका थिए।

चिनियाँ दूतावासले भने ती आरोपलाई ‘मनगढन्ते र दुर्भावनापूर्ण भ्रामक प्रचार’ भन्दै खण्डन गरेको छ। चीनले अन्य देशको आन्तरिक मामिलामा हस्तक्षेप नगर्ने आफ्नो नीति रहेको र बेलायतको आन्तरिक मामिलामा चासो नरहेको स्पष्ट पारेको छ।

एकातिर बेलायतले चीनमाथि जासुसी र हस्तक्षेपको आरोप लगाइरहेको छ भने अर्कोतिर चीनले आफ्ना नागरिकमाथि बेलायती अधिकारीहरूले गरेको व्यवहारप्रति आपत्ति जनाएको छ। यसले दुई देशबीचको कूटनीतिक सम्बन्धमा थप तनाव बढाएको छ।