हलमा लागे ‘होस्टेल ३’सहित कोरियाली र जापानी निर्देशकका फिल्म

अकुपेन्सी कस्तो छ ?

अनलाइनखबर

२०८१ फागुन २३ गते १२:१२

काठमाडौं । शुक्रबारदेखि नेपाली हलमा ३ नयाँ फिल्म प्रदर्शनमा आएका छन् । नेपाली भाषाको ‘होस्टेल ३’सहित हलिउडको ‘मिकी १७’ र जापानको ‘ओभरलड : द सेक्रेड किङडम’ रिलिज भए ।

‘होस्टेल ३’को रनटाइम १६५ मिनेट छ । निर्माता, निर्देशक र कलाकार हेरफेरसहित ‘होस्टेल’को तेस्रो श्रृंखला सार्वजनिक भएको हो । विद्यार्थीको होस्टेल र कलेज जीवनको कथावस्तुमा बनेको फिल्मलाई सशान कँडेल ‘सन्तोष’ले निर्देशन गरेका हुन् ।

‘जेन-जी’ पुस्ताका दर्शकलाई यो फिल्मको कथावस्तु रुचिकर हुनसक्छ । शुक्रबार बिहान यो फिल्मको देशब्यापी अकुपेन्सी १५ प्रतिशत हाराहारीमा देखिएको छ, जुन अपेक्षाभन्दा न्यून हो । फिल्मको ट्रेलर र टिजरले युट्युबमा चर्चा बटुलेको थियो ।

यो फिल्ममा पारस बम ठकुरी ‘कुल ब्वाय’, रिहान गिरी, सिम्रन पन्त, पदम तामाङ, आशिष घिमिरे लगायतको अभिनय छ । यी सबै कलाकारको यो डेब्यु फिल्म समेत हो । हलिउड फिल्म ‘मिकी १७’ले एडल्ट सर्टिफिकेट पाएको छ । यो फिल्मलाई १७ वर्ष उमेरभन्दा तलका दर्शकले हेर्न पाउनेछैनन् । १३७ मिनेट रनटाइमको यो फिल्मलाई एड्भेन्चर ड्रामा जनरामा राखिएको छ ।

रोबर्ट प्याटिन्सनको शीर्ष भूमिका रहेको यो फिल्मलाई अस्कर अवार्ड जित्ने दक्षिण कोरियाली निर्देशक बोङ जुन– होले निर्देशन गरेका हुन् । अस्कर जितेपछि बोङको यो फिल्मलाई लिएर पर्खाइ थियो । यो फिल्मले हिउँले भरिएको ग्रहमा उपनिवेश बनाउन निस्किएको एक समूहको कथा भन्छ ।

शुक्रबारदेखि जापानी फिल्म ‘ओभरलड : द सेक्रेड किंगडम’ पनि रिलिज भएको छ । १३५ मिनेट रनटाइमको यो फिल्मलाई एक्सन, एड्भेन्चर जनरामा राखिएको छ । शुक्रबारदेखि रिलिज भएका पछिल्ला दुई विदेशी फिल्मको ओपनिङ अकुपेन्सी न्यून छ ।